Diskussion:Europa

Anderi Religione

Bim Kapitel "Anderi Religione" stoot: Die indigene Religione si vollkommen usgrottet worde ..., da findi echli en öbertribni Formulierig. S isch zwoor richtig, ass kani vo de alte polytheistische Religione s Mittelalter intakt öberlebt het, aber ase knallhert isch s Christetum nur tailwiis vorgange. So isch di griechisch/römisch Mythologi und Philosophi - baides gwössermaasse au Aspekt vo de alt Religio - durchus pflegt wore. Anderi "indigeni" oder besser nödchristlichi Idee hend im Undergrund witerglebt (Ghaimbünd, Hexe, Okkultismus), starch vermischt mit fremde Elemend (z.B. Kabbala). I Randregione wie Skandinavie oder Baskeland hend sich vill Brüüch chöne hebe bis is 19. Joorhundert. Im Baltikum het die alti polytheistisch Religio bis is 16. Joorhundert glebt und isch no hüt i Volkslieder quasi present. Zudem hend vill alti Vorstelige jo au s Christetum prägt, nöd selte zum Laidwese vo de Gaistlichkait. Nochem moderne Forschigsstand chamer sege, as s Christetum immer wider welleförmig sich vo altem "haidnischem" Balast het müese rainige und as jedesmol mee vom "indigene" verlore ggange worden isch. De Gnadeschuss het aber woll di moderni Wösseschaft ggee.

Im grosse und ganze isch de Artikel aber guet und abwechsligsriich gschribe, no zwee oder drai Schliif dröber und s geeb en Kanditat för en guete Artikel. --al-Qamar 17:10, 15. Apr. 2008 (CEST)