Presidium del Sóviet Supremu de la Xunión Soviética

El Presidium del Sóviet Supremu de la Xunión Soviética (en rusu Президиум Верховного Совета СССР, Priezídium Verjóvnogo Sovieta SSSR) yera unu de los más importantes órganos de gobiernu de la Xunión Soviética, qu'exercía una xefatura d'Estáu coleutiva. Electu pol Sóviet Supremu en sesión conxunta de los sos dos cámares, tenía potestá llexislativa cuando esti non sesionaba (el Sóviet Supremu solo axuntábase en dos periodos añales). La so sede taba allugada nel Kremlin de Moscú.

Los diputaos electos al Presidium duraben nos sos cargos cuatro años, lo mesmo que cada llexislatura del Sóviet Supremu. El Presidium taba integráu pol Presidente, un diputáu por caúna de los quince repúbliques, un secretariu y venti miembros ordinarios. Toles sos actividaes taben suxetes a revisión pol Sóviet Supremu, a quien tenía de reportar. Cada república socialista soviética o república autónoma tenía amás el so propiu Presidium del Sóviet Supremu, que les sos funciones taben determinaes poles constituciones locales.

D'alcuerdu a la Constitución de la Xunión Soviética, les principales atribuciones del Presidium del Sóviet Supremu yeren les siguientes:

Promulgar decretos;
Interpretar la llexislación vixente;
Eslleir el Sóviet Supremu según lo dispuesto pol artículu 47 de la Constitución y llamar a nueves eleiciones;
Realizar un referendu nacional por iniciativa propia o a solicitú de dalguna de les repúbliques de la Unión;
Declarar la nulidá de decretos del Conseyu de Ministros y los conseyos de ministros de les repúbliques en casu de que discreparen cola llexislación vixente;
Relevar al Presidente del Conseyu de Ministros y nomar ministros, siempres que'l Sóviet Supremu nun s'atopara sesionando, cola posterior remisión al Sóviet Supremu pa la so aprobación;
Establecer órdenes y medayes, y otorgales;
Establecer títulos honorarios, y asignalos;
Conmutar penes;
Nomar y relevar a los miembros Estáu Mayor del Exércitu Coloráu;
Establecer rangos militares y diplomáticos, ente otros;
Declarar la movilización parcial o xeneral;
Declarar la guerra en casu d'ataque a la Xunión Soviética o en cumplimientu d'obligaciones de trataos internacionales de defensa mutua;
Ratificar y arrenunciar a trataos internacionales suscritos pola Xunión Soviética;
Representar al Sóviet Supremu, siempres qu'esti nun s'atopara sesionando, nes sos rellaciones con parllamentos estranxeros;
Nomar y relevar plenipotenciarios soviéticos nel estranxeru;
Recibir cartes credenciales de representantes diplomáticos estranxeros acreditaos na Xunión Soviética;
Declarar la llei marcial nuna rexón determinada o en tola Unión col propósitu de defender al país o caltener l'orde públicu y la seguridá del Estáu.

El Presidium tamién s'encargaba d'asuntos rellacionaos cola adquisición de la ciudadanía soviética, la so retirada o arrenunciu voluntariu a ella.

Ver tamién

Referencies

Enllaces esternos

del Presidium del Sóviet Supremu de la Xunión Soviética (semeya satelital)

55°45′08″N 37°37′12″E / 55.7523°N 37.6200°E / 55.7523; 37.6200