Jesse Robredo

Ladawan:J. Robredo.jpg

Si dating Sekretaryo Jesse Robredo

Si Jesse Manalastas Robredo (Mayo 2, 1958 - Agosto 18, 2012) sarong Ramon Magsaysay Awardee asin nagin alkalde nin kagsiyam (19) na taon kan ciudad nin Naga, Filipinas. Inot siyang nagserbe komo alkalde kan syudad kan 1988 sa edad na 29, bagay na nareparo siya an pinakahubin na nagtukaw sa siring na pwesto. Siya nanombrahan kan Hulyo 9, 2010 ni Pres. Benigno Aquino III bilang Sekretaryo kan Departmento nin Interior and Local Government asin iyo ini an katongdan na kapot niya sagkod sa saiyang kagadanan. .

Pamilya

An agom ni Robredo iyo si Abogado Leni Gerona, aki nin sarong retiradong huwes na si Antonio Gerona. An mag'agom may tolong aki, anas babae: Aika, Patricia asin Jillian.

Si Robredo ikaduwang henerasyon na Tsino-Filipino. Siya an aki ninda Jose Chan Robredo, Sr. asin Marcelina Manalastas. An paternal na lolohon niya sarong Tsinong imigrante nagngangaran Lim Pay Co na nagdangtol igdi sa Filipinas sa pag-aboton kan ika-20ng siglo. Si Lim Pay Co nagin Katoliko asin saiyang pighingako an pangaran na Juan Lim Robredo ta iyo an kostumbre na an sarong imigranteng Intsik inaarog an pangaran kan saiyang ninong o ninang. Si Lim Pay Co pinili na mangaran saiya an pangaran kan si pading nagbonyag saiya. An ama ni Robredo na si Jose Chan dinara pa man an apelyidong Chan ta ini an apelyido kan saiyang ina.

Edukasyon

Nag-adal si Robredo nin elementarya sa Naga Parochial School asin ipinadagos an sekundarya sa Ateneo de Naga. Nagtapos siya nin kolehiyo sa De La Salle University na igwan duwang degree sa Industrial asin Mechanical Engineering. Nakua niya an titulong Master sa Business Administration sa Unibersidad kan Pilipinas, asin Master sa Public Administration sa Harvard University sa Estados Unidos.

Enot na mga taon

Amay sa saiyang karera, si Robredo nagtrabaho sa San Miguel Coroporation kan 1980 sa Siyudad nin Mandaluyong sa seksyon kan Physical Distribution Technical Services sa lindong kan Generqal Services Division, dangan sa laog sana nin anom na bulan nagsakat na siya sa responsibilidad, nalampasan an duwang lebel, asin pinakapot sa Finance Division nin anom na bulan.

Kan an namamayo niya ipighubo sa Magnolia Ice Cream, sarong dibisyon kan San Miguel, si Robredo inalok mag'iba saiya asin siya natoka sa logistics asin planning na seksyon manta na siya kadungan man na staff assistant kan physical distribution director. Paglaog kan taon 1986, siya buninalik sa siyudad nin Naga kun saen nagin siyang Program Director kan Bicol River Basin Development Program, sarong ahensya na naghihingoa na maintegrar an gabos na developpment planning para sa orog na ikauuswag kan tolong probinsya nasasakop kan ronang Bicol.

Alkalde kan Naga

An tiyoon niyang si Luis Villafuerte, iyo an nag'agyat saiya na lumaog sa pulitika asin sa suporta kan gurang, siya nagdalagan para alkalde sa siyudad nin Naga asin siya nakatukaw sa sinabing pwesto kan 1988 asin huli kaini, siya na an pinakahubin na persona sa edad na 29, sa bilog na Filipinas, na nagkapot kan siring na katongdan. Si Robredo nabirik an kamugtakan kan Naga hale sa mabublay asin mayong kabuhaybuhay na siyudad asin nagin ini saro sa "Most Improved Cities in Asia" ("Mga Gantad na gayong mga Siyudad sa Asya"), siring sa ginawad na pagbisto kan Asiaweek Magazine kan 1999.

Masabi na kan siya nagtutukaw alkalde kan siyudad, si Robredo naomaw na gayo ta huli saiya napakusog nanggad an partisipasyon kan mga namamanwaan sa paggogobyerno, bagay na iyo an nagbalik sa siyudad an preeminernteng posisyon kaini bilang nangengenot na siyudad sa ronang Bicol. Kan 1995, bilang pagbisto kan saiyang kakayahan asin kabatiran komo sarong namomoon sa pagpalakaw nni banwaan, si Robredo napili mamayo bilang Presidente kan League of Cities of the Philippines, an kasararoan nin mga alkalde nin mga siyudad. Poon man 1992 abot 1998, si Robredo naelehir man Chairman kan Regional Development Council, sarong konseho na nagkokoordinar asin nagpaplano kan kauswagan kan anom na probinsya asin pitong siyudad igdi sa Kabicolan.

Pagkabiriyang ni Robredo asin ni Villafuerte

Bantog sa bilog na probinsya, na sa pulitika luwayluway nagkabiriyang na sinda Robredo asin Villafuerte asin pirang beses nagkaag nin kalaban sa eleksyon an gurang kontra ki Robredo alagad an bilog na Naga, huli sa makusog na pagtubod saiya, binobotohan pa siya. Lataw asin matingog na maray an kurahaw niya sa kampanya na "Ubos kun ubos, gabos kun gabos!" mala ta totoo mananggad mayo nakalusot ni saro sa linyada kan mga konsehal lado sa kandidatong kalaban ni Robredo.

2000 Ramon Magsaysay

Kan 2000, nagin recipiente siya kan Ramon Magsaysay Award para sa Servicio Publico.

Arog kaining eroplano (The Piper Seneca PA 34-200) an nalunadan ni Robredo na luminagpak sa dagat kan Masbate

Kagadanan

Kan Agosto 18, 2012 (oras sa Filipinas) an eroplanong Piper Seneca lunad si Sekretaryo Robredo naglagpak sa tongod kan Sola' nin Masbate. An eroplano haleng syudad nin Cebu kun saen siya imbitado sa inagurasyon kan sarong bagong edipisyo kan Philippine National Police asin pasiring nang siyudad nin Naga sa tuyong mapule sa saiyang pamilya orog na ta gusto niya mag'atender sa swimming competition na kinakabalihan kan ngohod niyang aking si Jillian. Sa apat na sakay, saro an nakaligtas buhay asin an duwang piloto saka si Robredo nakua garadan na pakatapos nin apat na aldaw na pugapugang pagrorip kan mga naghaharanap sainda. Nakua sinda nakakulong sa naglubog na eroplano asin ini nakasangat sa gilid nin ampas, 180 pye an rarom asin 800 metro an rayo sa kosa kan Masbate. .

Mga hihilngan

• Featured Mayor: Mayor Jesse M. Robredo

Mga panluwas na takod

• Ofisyal na Websahit kan Ciudad nin Naga
• Oddball - an saiyang personal blog
• An saiyang account sa Multiply
• TOYM Awardees