ယီးအွောဉ်ႏနယ်တဖူꩻသား

ဟွုန်ဖိုထွꩻဗာႏ အကျောင်ꩻခရာႏနုဲင်းယို အွိုးခတလဲင်ႏ ဗွေႏမျတ်ဘုရာꩻနဝ်ꩻ တွမ်ႏတန်ႏခိုꩻတောႏ အဝ်ႏသေထွꩻ "ဂဏကမောဂ္ဂလာနပုဏ္ဏာꩻ"ကတွိုႏလွဉ်ဗာႏ ဗွေႏမျတ်ဘုရာꩻထျꩻ အကျောင်ꩻခရာႏနဝ်ꩻသွူ။ "ဂဏကမောဂ္ဂလာနပုဏ္ဏာꩻ"နဝ်ꩻ ပေါႏဝွေꩻကမဲဉ်သေဒါႏ အကျောင်ꩻကိစ္စတဗာႏဗာႏအဝ်ႏသွူနဝ်ꩻ တအွဉ်ႏသိမ်ꩻခါꩻဒါႏတဝ်း သꩻကို။ အခွင်ꩻမိဉ်ႏသာႏ အခါႏမိဉ်ႏရော့ꩻသွူခိင်ႏနဝ်ꩻ နက်ထင်ႏရီစွဉ်ႏ ဗွေႏမျတ်ဘုရာꩻသွူ။ ယိုတလဲင်ႏတဲ့ ဝွေꩻကမဲဉ်သေဒါႏ ငဝ်းရီ ပျသနာႏနဝ်ꩻ ဝွေꩻရီလဝ်းထင်ႏစွဉ်ႏဒျာႏ ဘုရာꩻ " ရဟန်ꩻဂေါတမဟွေး... ရဟန်ꩻဂေါတမ တပဲ့ꩻသံဃာႏဖုံႏနဝ်ꩻ မိဉ်ႏလွောက်ꩻနာႏလွဉ်ꩻငါ နီဗွေႏငဝ်းသွဉ်သင်ဆုံꩻမငါ ဝွေꩻသီးကားကအဝ်ႏ နိဗ္ဗာန်ႏကိစ္စ ထွူနွောင်ꩻထိုꩻစွဉ်ႏနဲ့ ?၊ တဝ်းလဲ့ တထွူနွောင်ꩻအီတဝ်းတဲ့ အဝ်ႏနဲ့ ?" နုဲင်းယိုသွူ။ ဂဏကမောဂ္ဂလာနပုဏ္ဏာꩻ ငဝ်းရီပျသနာႏယို ဗွေႏမျတ်ဘုရာꩻ မိဉ်ႏစေ/ဖြေႏချာ သေႏသေႏချာႏချာႏဒျာႏမꩻ အီႏထဲ့မဲဉ်ႏသော့ꩻ အီꩻရော့ꩻတွမ်ႏ ပုဏ္ဏာꩻသꩻ ဗွေႏမျတ်ဘုရာꩻအဝ်ꩻသေထွꩻတဲင် ဗွေႏဘုရာꩻနဝ်ꩻ ယွယွသာႏသာႏ စေ/ဖြေႏချာခန်းဒျာႏ ဂဏကမောဂ္ဂလာနပုဏ္ဏာꩻ ငဝ်းရီ ပျသနာႏ "ယို ပုဏ္ဏာꩻဟွေး... ဘုရာꩻခွေ မိဉ်ႏစေ/ဖြေႏလင်ꩻချာဗာႏ နာꩻကရီလဝ်းထင်ႏဒါႏ ငဝ်းနဝ်ꩻ 'နိဗ္ဗာန်ႏကိစ္စ ကထွူနွောင်ꩻအီသားလဲ့ အဝ်ႏ၊ တထွူနွောင်ꩻအီတဝ်းသားလဲ့ အဝ်ႏ'" နုဲင်းယိုသွူ။ "ရဟန်ꩻဂေါတမဟွေး... နိဗ္ဗာန်ႏကရိုꩻဒါႏ အမတဝေင်ꩻခေႏမာႏနဝ်ꩻလဲ့ အဝ်ႏဒျာႏ၊ တဖူꩻကတွိုႏလွေꩻဒါႏ နိဗ္ဗာန်ႏနဝ့်လဲ့ အဝ်ႏဒျာႏ၊ နဝ်ꩻထွူ ကယီးအွဉ်ႏနယ်ဖေႏနွောင်ꩻဒါႏ တဖူꩻသား ဗွေႏရဟန်ꩻဂေါတမလဲ့ အဝ်ႏဒျာႏ၊ ကအဝ်ႏငါႏနုဲင်းယိုနဝ်ꩻ နီဗွေႏ တပဲ့ꩻသံဃာႏ ယဟန်ႏဖုံႏနဝ်ꩻ ပွိုးတမုဲင်ꩻ နိဗ္ဗာန်ႏကိစ္စ မွော့တထွူထိုꩻတဝ်းတွိုႏဟောင်း?"။ဂဏကမောဂ္ဂလာနပုဏ္ဏာꩻ ငဝ်းရီယိုနဝ်ꩻ ရီရိုꩻရိုꩻဒျာႏရိုꩻဗာႏကီလဲ့ နုဲင်းစွဉ်ႏ အံႏဖြာႏငါႏ ဗွေႏဘုရာꩻလွိုႏလွိုႏ ထွူ မဲဉ်နျꩻဖွိုႏဒျာႏ ဗွေႏဘုရာꩻ အသဖောꩻတရာꩻ လွေꩻထိုꩻ နုဲင်းနဝ်ꩻသွူ။

နဝ်ꩻမꩻ အဝ်ႏနဝ်ꩻထွူ ဗွေႏမျတ်ဘုရာꩻ ရီ/ စေလင်ꩻချာတောမ်ႏ ဂဏကမောဂ္ဂလာနပုဏ္ဏာꩻ "ပုဏ္ဏာꩻဟွေး... ဘုရာꩻခွေ ရီလင်ꩻချာ နာꩻယိုနေား၊ တဖူꩻကလွေꩻတွို;နွောင်ꩻအီဒါႏ ဝေင်ꩻရာဇဂျိုဟ်ႏသူꩻနဝ်ꩻ နာꩻယီးအွဉ်ႏနယ်ဖေႏနွောင်ꩻဒျာႏကရို ?"။ "ရဟန်ꩻဂေါတမဟွေး... နုဲင်းကွို့ꩻ ငဝ်းရီနဝ်ꩻပေႏဟ ယပ်ꩻခုဲင်ႏကဲးနုဲင်းမုဲင်ꩻဟောင်း?၊ ပုဏ္ဏာꩻခွေသွဉ်း စေ/ဖြေႏနွောင်ꩻဒျာႏယိုꩻယိုꩻပေႏသနယ်" နုဲင်းယိုသွူ။ "မွေးလဲဉ်းသွူ၊ နဝ်ꩻတဲ့ နာꩻစေ/ဖြေႏ သုပ်စမ်ꩻယင်းမွိုင်ဒါႏ၊ ပါꩻကမဲဉ်တွိုႏဒါႏရာဇဂျိုဟ်ႏသား နီဖြာꩻနဝ်ꩻ တွိုႏလွဉ်ခန်းနာꩻထျꩻထွူ ရီခန်းနာꩻ တဖူꩻကတွိုႏလွေꩻဒါႏ ရာဇဂျိုဟ်ႏသနယ်နော်ႏ...၊ တွိုႏနဝ်ꩻတွော့ꩻ နာꩻယီးအွဉ်ႏနယ်ဖေႏခန်း *တဖူꩻယိုတလီးနဝ်ꩻ တွိုႏလွေꩻနွောင်ꩻအီ ရာဇဂျိုဟ်ႏ၊ မိဉ်ႏထောင်လွေꩻတဖူꩻယိုအတွိုင်ꩻနဝ်ꩻ မိဉ်ႏတွိုႏအရပ် ခွိုင်းယိုကားနဝ်ꩻနဝ်ꩻ တွိုႏပါ၊ ထီႏပါဗာႏ ကာႏလွေꩻပါဗာႏ ဒုံယိုဒုံနဝ်ꩻသွူ၊ မိဉ်ႏကာႏလွေꩻ ဒုံနဝ်ꩻထွူနဝ်ꩻ တွိုႏလွေꩻစွဉ်ႏ သာႏယာႏဟဝ်ငါႏ ဝေင်ꩻရာဇဂျိုဟ်ႏ* နုဲင်းနဝ်ꩻသွူ"။ ပါꩻကရီတဖူꩻလွေꩻတွိုႏ ရာဇဂျိုဟ်ႏသား နီဖြာꩻယိုနဝ်ꩻ နာꩻယီးအွဉ်ႏနယ်ခန်း သေႏခေါင်းသေႏချာႏလဲ့ နာꩻကယီးအွဉ်ႏနယ်ဖေႏဒါႏအတွိုင်ꩻ ပါꩻတဖြာꩻနဝ်ꩻ ထောင်လွေꩻလွဉ်ꩻတဲင် တွိုႏလွေꩻခန်း ဝေင်ꩻရာဇဂျိုဟ်ႏသနယ်နောႏ..."။ "မွေး.. ရဟန်ꩻဂေါတမ"။ "အဝ်ႏကုဲင်ပါꩻတဖြာꩻနဝ်ꩻ နာꩻကယီးအွဉ်ႏနယ်ဖေႏဒါႏ တဖူꩻတွိုႏလွေꩻ ဝေင်ꩻရာဇဂျိုဟ်ႏအတွိုင်ꩻ သမ်းတထောင်လွေꩻလွဉ်ꩻတဝ်း၊(လွေꩻလုဲင်ႏတေားဒျာႏ တဖူꩻလုဲင်လီးတဲင်) ဝွေꩻနဝ်ꩻနဝ်ꩻ အီႏတွိုႏနွောင်ꩻနေ ဝေင်ꩻရာဇဂျိုဟ်ႏဟောင်း ?"။ "ရဟန်ꩻဂေါတမဟွေး... ပုဏ္ဏာꩻခွေကယီးအွဉ်ႏနယ်ဖေႏအတွိုင်ꩻ ပါꩻတထောင်လွေꩻလွဉ်ꩻတဝ်းသားနဝ်ꩻ မာꩻနုဲင်းမုဲင်ꩻ အီႏတွိုႏလွေꩻနွောင်ꩻ ဝေင်ꩻရာဇဂျိုဟ်ႏဟောင်း ?"။ "မွေးလဲဉ်းသွူ၊ နုဲင်းနဝ်ꩻက ဝေင်ꩻရာဇဂျိုဟ်ႏတဲ့ အဝ်ႏဒျာႏ၊ တဖူꩻကတွိုႏလွေꩻနွောင်ꩻအီ ဝေင်ꩻရာဇဂျိုဟ်ႏတဲ့ အဝ်ႏဒျာႏ၊ ဖေႏကတွိုႏလွေꩻနွောင်ꩻအီတာႏ သေႏသေႏချာႏချာႏ ကယီးအွဉ်ႏနယ်ဖေႏနွောင်ꩻဒါႏ တဖူꩻသား ပုဏ္ဏာꩻနာꩻတဲ့ အဝ်ႏဒျာႏ၊ ကွဲးတွော့ꩻ ပါꩻတဖြာꩻနဝ်ꩻ တွိုႏလွေꩻနွောင်ꩻ ဝေင်ꩻရာဇဂျိုဟ်ႏ ထွူ၊ ပါꩻတဖြာꩻနဝ်ꩻ တတွိုႏလွေꩻနွောင်ꩻတဝ်း ဝေင်ꩻရာဇဂျိုဟ်ႏ။ ကထွာနုဲင်းယိုနဝ်ꩻ ကောပ်ပွိုးတမုဲင်ꩻဟောင်း ? ပုဏ္ဏာꩻ "။ "ရဟန်ꩻဂေါတမဟွေး... တတွိုႏလွေꩻနွောင်ꩻတဝ်း ဝေင်ꩻရာဇဂျိုဟ်ႏသားနဝ်ꩻတဖြာꩻနဝ်ꩻ ကောပ်ပွိုးစွဉ်ႏဒျာႏ ဝွေꩻတထောင်လွေꩻလွဉ်ꩻတဝ်း ဝင်ꩻကယီးအွဉ်နယ်ဖေႏဒါႏ တဖူꩻအတွိုင်ꩻနဝ်ꩻသနယ်"။ "နုဲင်းနဝ်ꩻနေနေ နာ,ကရီလဝ်းထင်ႏဒါႏ ငဝ်းရီ အစေ-အဖြေႏနဝ်ꩻလဲ့ သျင်ꩻလဲဉ်းဒျာႏ၊ ဖြွောင်ႏလဲဉ်းဒျာႏသနယ်၊ နိဗ္ဗာန်ႏကရိုꩻနဝ်ꩻ အအဝ်ႏမွေးဒျာႏ၊ ဖေႏကတွိုႏနွောင်ꩻအီနိဗ္ဗာန်ႏတာႏ တဖူꩻစွို့ꩻစွဉ်ႏ၊ တဖူꩻမဲဉ်ႏတဲ့ အဝ်ႏဒျာႏ၊ ယိုနဝ်ꩻ တဖူꩻစွို့ꩻစွဉ်ႏ၊ တဖူꩻမဲဉ်ႏ ကယီးအွဉ်ႏနယ်ဖေႏနွောင်ꩻဒါႏသား ဘုရာꩻခွေတဲ့ အဝ်ႏဒျာႏ၊ကွဲးတွော့ꩻ ဘုရာꩻခွေ ကယီးအွဉ်ႏနယ်ဖေႏဒါႏ တဖူꩻစွို့ꩻစွဉ်ႏ တဖူꩻမဲဉ်ႏနဝ်ꩻအတွိုင်ꩻ မိဉ်ႏတထောင်လွေꩻလွဉ်ꩻတဝ်းနဝ်ꩻ တတွိုႏနွောင်ꩻတဝ်း နိဗ္ဗာန်ႏ၊ ကယီးအွဉ်ႏနယ်ဖေႏအတွိုင်ꩻ မိဉ်ႏထောင်လွေꩻလွဉ်ꩻမဲဉ်ႏမဲဉ်ႏနဝ်ꩻ တွိုႏနွောင်ꩻနိဗ္ဗာန်ႏသွူ။ အမဲဉ်ႏတဗာႏ ဘုရာꩻခွေယိုနဝ်ꩻ ထွာဒျာႏ ယီးအွဉ်ႏနယ်ဖေႏနွောင်ꩻ တဖူꩻလွေꩻ နိဗ္ဗာန်ႏလူမ်ꩻသွူ"။ "ဩဗွေႏ... ခွေသွဉ်း သေနာႏသဖောꩻဗွောင်လဲဉ်းသွူဩ၊ နီဗွေႏ ကစေ/ဖြေႏသျင်ꩻဖေႏဒါႏ တရာꩻနုဲင်းယိုနဝ်ꩻ နာႏခွင်ꩻလꩻဗာႏ၊ ဟွုန်ထွꩻ သေထွꩻဗာႏတဲင်ကေꩻဇူꩻတန်အာမွေးငါႏ မရေႏမရာႏသွူဩ။" "တယ်ႏစစွဉ်ႏဟန်ႏနီꩻယို မာꩻငါ ထီႏခွေသွဉ်းယိုနဝ်ꩻ မတ်ဒျာႏသွော့ သိုမ်ပါꩻရတနာႏ ကိုႏကွယ်ႏ၊ အာႏကွိုꩻ၊ ဆယ်ႏကပ်ဒါႏ *နီဗွေႏမျတ်ဘုရာꩻတပဲ့ꩻဥပါသကာႏ* နုဲင်းနဝ်ꩻ ဗွေႏဩ"။ "သာဓု ပုဏ္ဏာꩻ သာဓု သာဓု"။ ဂဏကမောဂ္ဂလာနပုဏ္ဏာꩻနဝ်ꩻ ထွိုင်ႏဟွုန်ထွꩻ၊ သေနာႏဗာႏ ဗွေႏမျတ်ဘုရာꩻထျꩻ ငဝ်း အရီ-အစေထွူ ထွိုင်ႏပြန်ႏသဲင်ꩻချာခိင်ႏ တဖူꩻလောင်းနဝ်ꩻ သꩻရေꩻသꩻသွိုꩻသွင်ႏသဲင်ꩻစွဉ်ႏဒျာႏထာꩻ တဖူꩻတလီးလူမ်းလူမ်းနဝ်ꩻသွူ။

---

> ဗွေႏမျတ်ဘုရာꩻနဝ်ꩻ နေးတွမ်ႏစူခင်ႏတဲင် တစွီႏထန်ႏ တကယ်ႏထန်ႏတဝ်း ပါꩻယိုပါꩻနဝ်ꩻ၊ နေးတွမ်ႏတရာꩻဖုံႏတဲင် ယီးအွဉ်ႏနယ်ဖေႏနေးဒျာႏ တဖူꩻစွို့ꩻစွဉ်ႏ တဖူꩻမဲဉ်ႏနဝ်ꩻသွူ။

> ဗွေႏမျတ်ဘုရာꩻ ကယီးအွဉ်ႏနယ်ဖေႏဒါႏ တဖူꩻစွို့ꩻစွဉ်ႏ တဖူꩻမဲဉ်ႏအတွိုင်ꩻ ကထောင်လွဉ်ꩻနွောင်ꩻသားဖုံႏနဝ်ꩻ တွိုႏထင်ႏနွောင်ꩻ နိဗ္ဗာန်ႏ၊ တထောင်လွဉ်ꩻနွောင်ꩻတဝ်း(ဒွိုန်း)သားနဝ်ꩻ အဝ်ႏခံ၊ တဝေ့ꩻတပန်ႏဗာႏနေက ဘဝသံသရာႏ ဩဃထီခြောင်နဝ်ꩻသွူ။