Behati Prinsloo

Behati Prinsloo (útspr.: [bi'a:ti prɪnslo:], "biati prinslo"; Grootfontein, 16 maaie 1988) is in blank Namibysk fotomodel en mannekên fan Afrikaner komôf. Hja is fral bekend as it gesicht fan it linzjerymerk Victoria's Secret, wêrfoar't hja ûnder oaren it sub-label Pink fertsjintwurdiget.

Behati Prinsloo
model
persoanlike bysûnderheden
echte namme	Behati Prinsloo
nasjonaliteit	Namibysk
berne	16 maaie 1988
berteplak	Grootfontein (Súdwest-Afrika)
etnisiteit	Afrikanersk
wurkpaad
soarte model	mannekên, fotomodel
jierren aktyf	2005 – no
offisjele webside
gjint

Libben en karriêre

Jonkheid en komôf

Prinsloo waard yn 1988 berne yn Grootfontein, yn wat doe noch it Súdafrikaanske mandaatgebiet Súdwest-Afrika wie. (Dat waard lykwols yn 1990 ûnôfhinklik ûnder de namme Namybje.) Hja is de dochter fan Boet en Magda Prinsloo, dy't beide fan etnysk Afrikaner komôf binne. Har heit is predikant, wylst har mem in bêd en brochje runt. Prinsloo har memmetaal is Afrikaansk; it Ingelsk is foar har in twadde taal dy't se oanleard hat op 'e legere skoalle.

Behati Prinsloo op de catwalk yn 2008.

Karriêre

Doe't se yn 2005 mei sechstjin jier op fakânsje wie yn Kaapstêd, yn Súd-Afrika, waard se "ûntdutsen" troch Sarah Doukas, de oprjochtster fan Storm Model Management en deselde dy't ek topmodel Kate Moss ûntdiek. Dêrmei sette Prinsloo har karriêre as model útein. Hja rûn as mannekên mei yn withoefolle moadeshows, û.m. foar topmerken as Chanel, Prada en Louis Vuitton.

Fierders stie se op 'e omslach fan û.o. de Amerikaanske, Meksikaanske, Russyske en Spaanske Vogue en fan 'e Frânske, Italjaanske en Sweedske Elle. Teffens wurke Prinsloo mei oan advertinsjekampanjes fan merken as Adore, Chanel, H&M, Hugo Boss, Marc by Marc Jacobs, Lacoste, Tommy Hilfiger en Gap.

Yn 2007 wurke Prinsloo foar it earst foar it linzjerymerk Victioria's Secret, dêr't se it gesicht waard fan it sub-label Pink. Dêrnjonken waard se yn 2008 ien fan 'e saneamde Victoria's Secrets Angels, en yn dy hoedanichheid iepene se de jierlikse moadeshow fan it merk yn 2014. Yn 2012 stie Prinsloo op it tolfde plak fan 'e ranglist fan 'e meast seksy modellen fan 'e wrâld fan 'e webside Models.com. Datselde jiers waard se it gesicht fan it Australyske baaikleanmerk Seafolly.

Behati Prinsloo op de catwalk yn 2008.

Njonken har modellewurk hat Prinsloo ek meiwurke oan ferskate fideoklips, wêrûnder dy fan it nûmer Rich Girls, fan 'e band The Virgins, en twa nûmers fan 'e band Maroon 5. Teffens spile se harsels yn 'e ôflevering Ha'awe Make Loa fan 'e Amerikaanske plysjesearje Hawaii Five-0.

Priveelibben

Prinsloo is goed befreone mei it Kanadeeske model Coco Rocha en mei har Victoria's Secret-kollega's Candice Swanepoel en Lily Aldridge. Fan 2005 oant 2012 hie se in relaasje mei it Britske model Jamie Strachan. Yn 2012 begûn se om te gean mei Adam Levine, de lead-sjonger fan 'e band Maroon 5, oan wa't se har yn july 2013 fersei. Prinsloo en Levine trouden op 19 july 2014 yn Meksiko.

Filmografy

jier	titel	rol	opmerkings
2012	Hawaii Five-0	as harsels	ôflevering: Ha'awe Make Loa

Fideoklip

jier	titel	artyst
2009	Rich Girls	The Virgins
2014	Animals	Maroon 5
2015	This Summer's Gonna Hurt Like a Motherfucker

Keppelings om utens

• (in) Fashion Model Directory
• (in) Folsleine filmografy fan Behati Prinsloo yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Behati Prinsloo fan Wikimedia Commons.