Stavropol

Stavropol (Russysk: Ста́врополь) is in stêd yn it suden fan Ruslân noardlik fan de Kaukasus. De stêd leit net fier fan de grins mei Tsjetsjeenje en is it bestjoerlike sintrum fan de kraj mei deselde namme.

Stavropol Ста́врополь
Flagge	Wapen
Polityk
Lân	Ruslân
Oblast	Stavropol
Sifers
Ynwennertal	458.233 (2022)
Oerflak	171.7 km²
Befolkingstichtens	2.668,8 ynw/km²
Hichte	620 meter
Oar
Stifting	1777
Tiidsône	UTC+3 MSK
Koördinaten	45° 02' N 41° 58' E
Webside	ставрополь.рф

Skiednis

Alde fêstingmuorre fan Stavropol

Yn 1777 waard de stêd as fort stifte. Tsjin it ein fan de 18e iuw wie it yn it Russyske Ryk moade om oan nije plakken pseudo-Grykske nammen mei de utgong 'pol' te jaan. Stavropol betsjut 'stêd fan it krús'. Werom't de stêd sa neamd waard soe te meitsjen hawwe kinne mei de fynst fan in krús by it lizzen fan de fûneminten fan it fort. In oare mooglikheid is dat it fort de foarm hie fan in langwerpich oerflak mei in soad hoeken en twa inoar krusende assen hat as basis. De flagge en it wapen ferwize ek nei de namme fan de stêd. It plak krige yn 1785 de status fan stêd.

Yn de jierren 1930 krige de stêd de namme Vorsjilovsk, nei de Sovjetlieder Kliment Efremovitsj Vorosjilov. Op 3 augustus folge de besetting fan de stêd troch foarút stoarmjende Dútske troepen. Op 12 augustus 1942 waarden de 3.500 joaden fan de stêd by inoar brocht en en yn de buert fan it fleanfjild deasketten. Nei de befrijing fan de stêd yn 1943 krige de stêd de âlde namme werom.

Yn 1931 waard yn in doarp by Stavropol Michail Gorbatsjov berne en makke nei syn stúdzje rjochten yn Moskou yn de jierren 1950 karjêre yn de Kommunistyske Partij fan Stavropol.

Strideraasjes yn de regio nei de ûntbining fan de Sovjet-Uny soargen foar in soad flechtlingen út de oanbuorjen dielrepubliken. Op 26 maaie 2010 fûn by it konsertgebou fan de stêd in terroristyske oanslach plak, flak foardat in Tsjetsjeenske dûnsgroep Vainach in foarstelling jaan soe en in soad minsken foar it gebou stiene. By de oanslach ferstoaren 8 minsken en 57 rekken ferwûne. Dokka Umarov fan it jihadistyske Kaukasysk Emiraat easke de oanslach op. Foar de útfiering en organisaasje fan de oanslach waard yn novimber dat jier de 21-jierrige Tsjerkes Rûstamov út Dagestan oppakt. Twa meiplichtige dieders, Abibûlla Abdûllajev en Farid Misrijev, kamen by de oanslach om it libben. Tsjerkes Rûstamov waard foar it rjocht skuldich ferklearre en krige libbenslang.

Befolking

Russen meitsje 89% fan de befolking út. Fierder is der in Armeenske mienskip, dy't 4,5% fan de befolking útmakket. De rest fan de befolking bestiet út lytsere minderheden.

Befolkingsferrin

Jier	1997	1939	1959	1970	1979	1989	2002	2010	2022
Ynwenners	41.590	85.121	141.023	198.251	258.233	318.298	354.867	398.539	458.233

Ofbylden dy't by dit ûnderwerp hearre, binne te finen yn de kategory Stavropol fan Wikimedia Commons.