Tucson

	Tucson
	Bestjoer
Lân	Feriene Steaten
Steat	Arizona
County	Pima County
	Sifers
Ynwennertal	520,116 (2010)
Oerflak	505,3 km²
Befolkingsticht.	1.078,8/ km²
Stêdekloft	1.020.200
Hichte	728 m
	Oar
Tiidsône	MST (UTC-7)
Koördinaten	32° 13' NB, 110° 55' WL
	Offisjele webside
	Offisjele webside Tucson

Tucson (sis: /ˈtusɑn/) is in stêd yn it súdlik part fan de Amerikaanske steat Arizona. It is it haadplak fan Pima County. Tucson leit 217 kilometer súdeast fan Foeniks, de grutste stêd fan de steat. De namme fan de stêd komt fan it O'odham-wurd Cuk Şon, dat 'swart foarberchtme/basis' betsjut, in ferwizing nei it fulkanysk berchtme bewesten de stêd.

Skiednis

It gebiet om Tucson wie al 12.000 f. Kr. fan de Paläoyndianen bewenne. Tichtby it stedssintrum fan Tucson waarden oerbliuwsels fan in doarp út sa'n 1000 f. Kr. fûn. Tusken 1200 f. Kr. en 150 n. Kr. waard yn de omkriten fan Tucson lânbou bedreaun. De stêd is dêrom ien fan âldste oanhâldend bewenne plakken yn de Feriene Steaten. De doetiidske bewenners leine yrrigaasjekanalen oan om har stynske weet en beannen bouwe te kinnen. Tusken 600 en 1450 n. Kr. hearske de Hohokamkultuer yn it gebiet.

Yn 1699 stichte de Spaanske jezuïet Eusebio Fransisko Kino in missypost (Mission San Xavier del Bac) yn it gebiet. De Spanjerts bouden der yn 1776 ûnder lieding fan Hugo O'Conor in fort (presidios) en de stêd dêr omhinne waard Tucson neamd. Tucson waard in Meksikaanske stêd neidat Meksiko yn 1821 ûnôfhinklik fan Spanje waard. Nei de Gadsdenoankeap fan 1853 waard de stêd Amerikaansk besit.

Fan 1867 oant 1877 wie Tucson de haadstêd fan it Territoarium Arizona. Yn 1885 waard dêr de Universiteit fan Arizona stifte. Nei de Twadde Wrâldkriich joegen in protte eks-militêren har del yn Tucson en doe't de air conditioning opgong makke hie, lutsen hieltyd mear minsken nei Tucson mei syn hjitte klimaat. De befolking waakste fan 8.000 yn 1880 nei 120.000 yn 1950 en 220.000 yn 1960.

Untjouwing befolking

Jier	Ynwennertal
1880	ca. 8.000
1950	120.000
1960	220.000
1980	330.538
1990	411.480
2000	486.699
2005	515.526

Klimaat

Jannewaris hat in trochsneed temperatuer fan 10,7 °C, yn july is dat 30,3 °C. Jierlikske delslach is trochstrings 304,8 mm (feiten op basis fan de mjitperioade 1961-1990).