Method Man

Method Man
Gebuertsnumm	Clifford Smith
Pseudonym	MethodMan / Johnny Blaze / Mr. Meth / Meth-Tical
Gebuer	2. Mäerz 1971 Hempstead
Nationalitéit	USA
Aktivitéit	Rapper, Lidderschreiwer, Museksproduzent, Schauspiller
Member vun	Wu-Tang Clan

De Method Man, mat richtegem Numm Clifford Smith, gebuer den 2. Mäerz 1971 zu New York, ass en US-amerikanesche Rapper a geleeëntleche Schauspiller. Hien ass ee vun de bekanntste Membere vum Hip-Hop-Kollektiv Wu-Tang Clan an och een Deel vum Duo Method Man & Redman.

Karriär

Dem Method Man säin Numm kënnt vun engem Film aus dem Joer 1979 mam selwechten Numm.

Hien ass ee vun nëmmen zwéi Membere vum Wu-Tang Clan, deen e Solotitel op dem Kollektiv sengem Debutalbum Enter the Wu-Tang: 36 Chambers krut, an deen éischten deen e Soloalbum verëffentlecht huet. Tical (1994) gouf positiv vun der Kritik opgeholl an huet et direkt op déi véiert Plaz vun den amerikaneschen Charts gepackt. En huet sech méi wéi eng Milliounmol verkaaft. D'Lidd All I Need gouf als eng vun de Singelen ausgekoppelt an ass en Hit ginn. E Remix dovu mam Mary J. Blidge (I'll Be There for You/You're All I Need) huet spéider e Grammy Award gewonnen.

Ëm déi selwecht Zäit huet hie Featuringen op de Placke vun anere Rapper gemaach, dorënner dem Notorious B.I.G. säi Ready to Die, dem Spice 1 säin AmeriKKKa's Nightmare, dem A.G. säi Goodfellas an dem 2Pac säin All Eyez on Me.

1997 huet hie mam Wu-Tang Clan de laang erwaarten zweeten Album Wu-Tang Forever erausbruecht, vun deem schlussendlech iwwer 8,3 Millioune Kopie verkaaft goufen. Säin zweete Soloalbum Tical 2000: Judgement Day (1998) war och erëm e groussen Erfolleg, ënner anerem wéinst de Singelen Judgment Day a Break Ups 2 Make Ups (zesumme mam D'Angelo). E behandelt vill apokalyptesch Theorien iwwer d'Enn vum 2. Joerdausend.

Duerno ass de Method Man mam Jay-Z, mam Redman, mam Ja Rule a mam DMX op Tour gaangen an huet mam Redman de Party-Album Blackout! opgeholl. Wéinst deem sengem Erfolleg sinn déi zwéin dunn zesummen a Filmer (z. B. How High) an op der Televisioun opgetrueden. Sou ware si d'Stare vun der kuerzlieweger Sitcom Method & Red. Och haut gi si wéinst deene Filmer nach mat Marihuanakonsum a Verbindung bruecht.

No de weidere Wu-Tang-Clan-Placken The W (2000) an Iron Flag (2001) huet de Method Man 2004 mat sengem drëtten Album Tical 0: The Prequel zwar e weidere kommerziellen Hit gefeiert, besonnensch wéinst dem Succès vun der Partysingle What's Happenin mam Busta Rhymes. Vill Kritiker hunn awer fonnt, datt d'Lidder sech nëmmen nach géife wéi generesche Party-Rap unhéieren an datt dem Method Man seng Musek ze vill Mainstream gi wier.^, Dowéinst huet hien entscheet, sech fir säin nächst Wierk 4:21: The Day After (2006) nees zeréck op seng Hip-Hop-Wuerzelen ze besënnen, wat d'Kritiker an d'Fans gutt fonnt hunn, mä kommerziell net sou gutt ukomm ass. Et gouf keng Single ausgekoppelt a kee Museksvideo gedréint, mä dofir huet de Method Man op enger Welttournée Promo fir den Album gemaach.

2009 ass den Album Blackout! 2 mam Redman erauskomm. Duerno sinn déi zwéi Rapper op Tour gaangen. 2015 ass dunn nach dem Method Man säi fënneften Album The Meth Lab verëffentlech ginn, dee gemëscht Kriticke krut.

Discographie

Soloalbumen

• 1994: Tical
• 1998: Tical 2000: Judgement Day
• 2004: Tical 0: The Prequel
• 2006: 4:21... The Day After
• 2015: The Meth Lab
• 2018: Meth Lab Season 2: The Lithium
• 2022: Meth Lab Season 3: The Rehab

Kollaboratiounsalbumen

• 1999: Blackout! (mam Redman)
• 2009: Blackout! 2 (mam Redman)
• 2010: Wu-Massacre (mam Ghostface Killah a dem Raekwon)

Um Spaweck

Commons: Method Man – Biller, Videoen oder Audiodateien

• Method Man op Twitter
• Method Man an der Internet Movie Database
• Method Man bei Rate Your Music