Irakkrieg
De Irakkrieg weer en Krieg vun de USA un annere, verbünnte Staten (in'n speziellen dat Vereenigte Königriek un Australien) gegen den Irak. Offiziell hebbt dörtig Länner Solidarität mit de USA toseggt („Koalitschoon vun de Willigen“). De USA, Grootbritannien un Australien hebbt den Krieg mit Resolutschoon 687 vun de Vereenten Natschonen legitimeert. De Irak hett sik aver nich an de Uplagen hollen un de Wapenstillstand hett dormit keen Grundlaag un de Krieg kunn wedder upnommen warrn. Dorto kummt ut Sicht vun de USA Resolutschoon 1441, wat „eernsthaftige Konsequenzen“ för den Irak bi mangeln Kooperatschoon fastleggt.
Bannig vele Länner un Völkerrechtlers gaht dorvun ut, dat beide Resolutschonen nich henlangen döen as Grund för en Krieg un dat de Krieg somit nich recht is. Vele Lüüd hebbt den Indruck, dat weer de USA um ganz annere Interessen in den Krieg gahn, as um Interessen vun de Öölweertschap oder geostrategisch Interessen.
Militärisch Afloop
De Krieg fung an mit dat Bombardeern vun Bagdad an den 17. März 2003. An den 23. März sünd Boddentruppen ut Kuwait folgt. Briten hebbt in'n Süden ehrn Swoorpunkt harrt, de USA in'n Noorden vun den Irak, Bagdad insloten. In den Nordirak hebbt de USA verbünnte Kurden ünnerstütt.
Vun'n 3. April bit to'n 9. April hebbt de Amerikaner Bagdad innahmen. Saddam Hussein, de iraksche Präsident, is siet den amerikaanschen Sieg verschollen wesen (bet Dezember 2003). Vele kulturelle Göder vun de ollen Babyloniers un Sumerers sünd bi Plünnern ok afhannen kamen.
Nah den Krieg harrn de USA dat Updelen vun den Irak in dree Sektoren plant: een amerikanschen, een britischen un een poolschen Sektor. So is dat denn kamen.
Hüüt hebbt de US-Truppen un de Briten grote Problemen, Sympathien bi de Irakers to kriegen. Elk Dag weert en Reeg vun allieerte Soldaten ümbracht oder verwundt un islamistische Terroristen kriegt bannig veel Toloop vun de Inwahners - speziell vun de jungen Lüüd.
An'n 13. Dezember 2003 hebbt de Amerikaners Saddam Hussein to faten kregen. He hett sik bi sien Heimatstadt Tikrit in en Eerdlock versteken.