ᥘᥨᥐ
ᥘᥨᥐ ᥟᥢ ᥝᥣ ᥘᥭᥳ ᥙᥥᥢ ᥖᥨᥝ ᥛᥤᥰ ᥙᥤᥐᥱ ᥔᥩᥒᥴ ᥑᥩᥢᥴ ᥘᥦᥲ ᥛᥤᥰ ᥑᥨᥢᥴ ᥔᥥᥴ ᥙᥥᥢ ᥔᥖᥴ ᥖᥨᥝ ᥟᥧᥢᥱ ᥘᥢᥳ ᥕᥝᥳ. ᥐᥩᥭᥰ ᥐᥣ ᥘᥨᥐ ᥐᥧ ᥖᥨᥝ ᥟᥛᥱ ᥛᥥᥢᥴ ᥘᥭᥲ ᥘᥒᥱ ᥐᥝᥱ. ᥘᥨᥐ ᥛᥣᥒ ᥛᥥᥝᥰ ᥘᥭᥳ ᥔᥛᥳ ᥘᥦᥢ ᥚᥣᥭᥴ, ᥛᥣᥒ ᥛᥥᥝᥰ ᥔᥛᥳ ᥘᥩᥭᥰ ᥘᥛᥳ ᥘᥛ ᥘᥛᥳ ᥐᥦᥒᥱ, ᥘᥨᥐ ᥘᥭᥳ ᥙᥥᥢ ᥔᥖᥴ ᥟᥢ ᥛᥤᥰ ᥔᥢᥴ ᥘᥒᥴ ᥔᥥᥴ ᥛᥨᥝᥴ ᥑᥭᥱ ᥘᥢᥳ ᥕᥝᥳ. ᥚᥩᥒᥰ ᥛᥫ ᥘᥧᥐ ᥑᥝᥴ ᥖᥦᥐᥱ ᥟᥩᥐᥱ ᥑᥭᥱ ᥙᥥᥢ ᥖᥨᥝ ᥛᥣᥰ ᥘᥢᥳ ᥐᥩᥲ ᥑᥝᥴ ᥛᥨᥝᥴ ᥘᥧ ᥞᥢᥴ ᥘᥧᥛᥰ ᥘᥣᥰ ᥙᥢ ᥘᥧᥐ ᥑᥝᥴ ᥕᥝᥳ. ᥘᥨᥐ ᥖᥒᥰ ᥔᥤᥒᥲ ᥘᥭᥳ ᥛᥥᥝᥰ ᥙᥩᥒᥰ ᥛᥢᥰ ᥛᥤᥰ ᥕᥧᥱ 10000 ᥘᥫᥴ ᥔᥥᥴ ᥖᥥᥴ ᥘᥭᥲ ᥝᥣ ᥙᥥᥢ ᥖᥨᥝ ᥔᥖᥴ ᥟᥢ ᥛᥤᥰ ᥔᥢᥴ ᥘᥒᥴ ᥟᥢ ᥓᥫᥳ ᥚᥢᥰ (ᥟᥤᥒᥰ ᥐᥣ ᥘᥥᥖ: Tetra pod) ᥙᥦᥐᥱ ᥙᥫᥒ ᥐᥢ ᥘᥛᥴ ᥔᥥᥴ ᥙᥫᥢ ᥘᥭᥴ ᥕᥧᥱ, ᥖᥥᥱ ᥟᥝ ᥞᥨᥝᥴ ᥐᥛᥱ ᥚᥣᥱ ᥖᥨᥝᥱ ᥗᥪᥒᥴ ᥞᥣᥒᥴ ᥐᥛᥱ ᥚᥣᥱ ᥘᥨᥐ ᥐᥧ ᥛᥥᥝᥰ ᥛᥥᥝᥰ ᥟᥩᥢ ᥐᥢ ᥕᥧᥱ ᥔᥝᥰ ᥐᥤᥢ ᥔᥣᥒᥲ ᥓᥩᥛᥰ ᥘᥨᥭ ᥔᥣᥱ ᥚᥣᥱ ᥝᥣᥳ ᥚᥬᥴ ᥛᥢᥰ ᥝᥭᥳ ᥕᥧᥱ, ᥔᥦᥢᥰ ᥘᥨᥐ ᥘᥭᥳ ᥖᥥᥱ ᥟᥝ ᥘᥨᥐ ᥙᥤᥖᥱ ᥟᥢ ᥔᥨᥙᥱ ᥘᥦᥛᥴ ᥓᥧᥙᥱ ᥐᥢ ᥘᥛᥳ ᥘᥨᥒᥱ ᥛᥩᥐᥱ (Bee Hummingbird) ᥖᥣᥒᥰ ᥕᥬᥱ ᥛᥤᥰ 5 ᥓᥤᥢᥱ ᥖᥤᥱ ᥛᥤᥱ ᥗᥫᥱ ( 2 ᥗᥖᥴ ) ᥖᥨᥝᥱ ᥗᥪᥒᥴ ᥘᥨᥐ ᥛᥣᥳ ᥐᥩᥐᥱ ᥖᥣᥒᥰ ᥕᥬᥱ ᥛᥤᥰ 2.7 ᥛᥤᥱ ᥗᥫᥱ ( 9 ᥗᥖᥴ )ᥘᥢᥳ ᥕᥝᥳ, ᥙᥩᥰ ᥟᥝ ᥓᥩᥛᥰ ᥘᥒᥱ ᥔᥣᥐ ᥞᥣᥐ ᥞᥤᥢ ᥟᥢ ᥑᥧᥖ ᥘᥭᥲ ᥘᥢᥳ ᥝᥣ ᥘᥭᥴ ᥘᥨᥐ ᥓᥫᥰ ᥘᥭᥳ ᥘᥧᥐ ᥖᥤ ᥟᥣᥐᥱ ᥑᥣᥒᥴ ᥐᥛᥱ ᥚᥣᥱ ᥟᥢ ᥞᥩᥒᥳ ᥝᥣ ᥖᥣᥭᥱ ᥘᥨᥝᥱ ᥔᥨᥝᥰ ᥛᥣᥰ ᥖᥨᥝᥱ ᥗᥪᥒᥴ ᥙᥣᥢ ᥓᥧᥰ ᥞᥥᥖ ᥔᥤᥐ ᥝᥣ ᥘᥭᥴ ᥛᥤᥰ ᥛᥣᥰ ᥙᥤ ᥙᥩᥒᥰ ᥘᥣᥢᥳ 150 ᥖᥨᥝᥱ ᥗᥪᥒᥴ ᥘᥣᥢᥳ 200 ᥙᥤ ᥘᥭᥴ ᥕᥝᥳ. ᥚᥧᥱ ᥘᥨᥒᥳ ᥘᥦᥢᥱ ᥢᥤ ᥑᥣᥱ ᥖᥣᥳ ᥙᥥᥱ ᥖᥣᥳ ᥑᥝᥴ ᥖᥥᥳ ᥘᥣᥖ ᥝᥣ ᥘᥨᥐ ᥓᥫᥰ ᥘᥭᥳ ᥘᥧᥐ ᥖᥤ ᥓᥫᥳ ᥚᥢᥰ ᥖᥣᥭᥱ ᥘᥨᥝᥱ ᥔᥨᥝᥰ ᥟᥣᥐᥱ ᥑᥣᥒᥴ ᥐᥛᥱ ᥚᥣᥱ ᥘᥢᥳ ᥔᥥᥴ ᥐᥪᥖᥴ ᥝᥭᥳ ᥘᥦᥲ ᥙᥥᥢ ᥛᥣᥰ ᥘᥭᥴ ᥕᥝᥳ.