志蓮淨苑

志蓮淨苑（粵拼：Zi3 nin4 zing6 jyun2；英文：Chi Lin Nunnery）係香港一個佛教非牟利慈善團體嘅佛廟。佢會定期咁舉行法會。

志蓮淨苑嘅院址係喺香港九龍鑽石山嘅志蓮道五號。嗰棟院寺堂以仿唐原木結構建築為特色，同周圍嘅斧山公園同南蓮園池結合做大型嘅仿唐建築群，係香港嘅特色建築同景點之一。志蓮淨苑亦係香港唯一嘅「女眾十方叢林」，為咗由各地而嚟嘅女性高僧提供修道場所。

歷史

響 1934 年由葦庵法師同覺一法師，喺藍昌源等居士嘅幫手之下，成立咗一所佛教女眾十方叢林，做僧侶清修嘅場地。嗰時好多難民因為國共內戰而走難湧入香港，唔少聚居喺黃大仙同鑽石山嗰頭嘅木屋區，社會福利服務嘅需求好大，所以志蓮淨苑就喺 1948 年搞義學為啲窮嘅細路仔提供教育。1957 年重開埋非牟利嘅孤兒院同老人院，收容啲貧苦無依嘅人。

喺 1988 年 5 月，香港政府因為要起大老山隧道而拆咗志蓮淨苑同周邊嘅木屋區，政府嘅市區重整計劃同熱心人士嘅支持（尤其是係藝術界同演藝界），造就咗志蓮淨苑嘅重建計劃，首先就重建護理安老院、志蓮中心，跟手就係佛寺、學校、同蓮苑。志蓮淨苑嘅重建工程喺 1989 年展開，全部重建工程響 2000 年 5 月 18 日搞掂，並正式咁啟用。

護理安老院（左）及志蓮中心（右）
佛教志蓮學校

殿堂

志蓮淨苑嘅殿堂係以大唐嘅傳統木構建築做板，採用天然嘅材料，殿堂嘅木構件，都係以榫接嘅方式組合，唔使用釘，比例和諧。殿堂供奉嘅佛菩薩像依據佛經嘅描述，參照盛唐嘅造像風格，厚重端麗，佢哋嘅造型、手印、執持法器都唔同，彰顯諸佛菩薩特有嘅願力同德行。

成個殿堂南、東、西邊設三個大門，分別係「山門」、「東門」同「西門」。整體建築佈局係「三進三重門一院」：

第一進（闊66米，深36米）
- 山門
- 蓮池
- 長明燈
- 長廊
- 天王殿
- 鐘樓
- 鼓樓

第二進
- 大雄殿
- 客堂
- 藥師殿
- 祖堂
- 觀音殿
- 臥佛殿
- 淨土經變圖

第三進
- 葦公紀念堂/五觀堂
- 法堂
- 藏經樓
- 方丈室
- 念佛堂

一院
- 萬佛塔

建築特點

志蓮淨苑用盛唐敦煌莫高窟嘅第 172 窟北「觀無量壽經變」圖做佛寺嘅設計規劃藍本，以中軸線做主體佈局，呈現對稱、均衡嘅唐朝建築風格。小部份嘅建築手法採用日本嘅「和樣」形式^[1]。全棟建築物完全以檜木打造，是現在世界上最大的手造木構建築群。^[2]「西方淨土變」又會嗌做「阿彌陀經變」，估計係敦煌石窟最早出現嘅經變之一，所謂「經變」，即係將佛經嘅內容「變」做圖畫，甚至係雕塑嘅尊像，「西方淨土變」就係用圖畫嚟描述西方極樂世界。

山門

山門又嗌做「三門」，即係三解脫門咁解。為面闊三間進深兩間單檐歇山頂，柱頭用出兩跳五鋪作偷心造，令拱出耍頭上承替木，泥道拱承枋隱刻慢拱，補間用蜀柱承散斗。正面心間開板門，兩盡間施直欞窗。

天王殿

天王殿嘅設計參考咗敦煌壁畫同埋日本平等院嘅鳳凰堂。面闊五間重檐歇山頂施鎏金鴟尾，上檐三間，用雙抄雙昂四出跳七鋪作承令拱出耍頭，第三跳計心造，泥道拱承枋隱刻慢拱。心間開板門，兩盡間施直欞窗。副階用材就偏細，出檐短於上檐，心間出單材華拱一跳四鋪作，兩補間均出一跳，補間與柱頭泥道拱連為鴛鴦交首拱。盡間稍間之柱用一斗三升把頭絞項造出昂形耍頭。轉角鋪作均與心間同，角縫出批竹角昂。

蓮花池

蓮花係佛教嘅法花，係純淨無染咁解。四個蓮花池係跟住「淨土經變圖」展現嘅阿彌陀佛淨土嘅七寶池同八功德水嚟設計^[1]。

鐘樓、鼓樓

兩樓皆面闊進心一間，無平座層，上施四角攢尖頂飾寶珠。用雙補間，雙抄五鋪作上承令拱唔出頭。拱眼壁開團窠形氣窗，四壁用直欞窗。

大雄殿

大雄殿用山西五台山佛光寺東大殿做板，縮七間做五間，並且用推山延長正脊，單檐廡殿頂上施金鴟尾。斗拱鋪作與佛光寺幾乎全同，不同在補間加添了斗子蜀柱於闌額上承第一層枋，枋間不用散斗。柱頭鋪作為雙抄雙下昂七鋪作令拱替木出耍頭，第二跳計心承泥道拱慢拱，扶壁用泥道拱慢拱合兩組。補間為蜀柱承枋，出兩跳，第一跳承駝峰，第二跳承令拱耍頭。心間石兩稍間開板門，兩盡間係直欞窗。

南蓮園池

同志蓮淨苑對應嘅南蓮園池係一座古式園林，面積達三點五萬平方米，山、水、林木同建築小品嘅建設同佈局，都係依照大唐嘅風格，南蓮園池以每年一蚊嘅象徵式收費委託志蓮淨苑管理、營運同保育。除咗咁，志蓮淨苑亦都負責公園嘅設計、監督建造同埋日常維修工作。

睇埋

攷

↑ ^1.0 ^1.1 郭錦鴻 (2008–11)。〈特色以外—志蓮淨苑布局對人文精神的體現〉。《香港佛教》網站。原著喺2010-06-12歸檔。喺2012-08-13搵到。 {{cite web}}: Cite has empty unknown parameter: |coauthors= (help)CS1 maint: date format (link)
↑ 志蓮淨苑日本平等院風情HK 港生活

出面網業

[志蓮淨苑布局對人文精神的體現-1] 1.0 ^1.1 郭錦鴻 (2008–11)。〈特色以外—志蓮淨苑布局對人文精神的體現〉。《香港佛教》網站。原著喺2010-06-12歸檔。喺2012-08-13搵到。 {{cite web}}: Cite has empty unknown parameter: |coauthors= (help)CS1 maint: date format (link)

[2] 志蓮淨苑日本平等院風情HK 港生活

[1]

[2]