Gaan na inhoud

LibreOffice

in Wikipedia, die vrye ensiklopedie
LibreOffice
Kort opsomming van die logo.
Ontwikkelaar Die Document Foundation
Nuutste betaweergawe 25.2 Beta1[1] Edit this on Wikidata/ 12 Desember 2024
Bedryfstelsel Microsoft Windows, Mac OS X, Linux
Kategorie Kantoorpakket
Lisensie LGPL 3 met nuwe bydraes ook beskikbaar onder die Mozilla Public License 2
Webblad https://www.libreoffice.org

LibreOffice is 'n vrye sagteware kantoorpakket ontwikkel deur die Document Foundation as 'n vertakking van OpenOffice.org. Dit is versoenbaar met ander bekende kantoorpakkette insluitend Microsoft Office en IBM Lotus, en is beskikbaar op 'n verskeidenheid bedryfstelsels. Die ontwikkelaars se doel is om 'n ondernemer-onafhanklike kantoorpakket met ODF-ondersteuning te verskaf. Die naam is 'n saamgestelde woord met die eerste deel Libre, wat vry beteken (soos in vryheid) in beide Spaans en Frans, en die Engelse woord Office. Die Document Foundation beoog om nuwe weergawes van LibreOffice vry te stel een keer elke ses maande en uiteindelik in lyn met die Maart / September skedule van die ander belangrike vrye sagteware projekte.[2]

LibreOffice 3.3 is reeds meer as 1,3 miljoen keer afgelaai[3] van die internet en is die standaard-kantoorpakket van Ubuntu,[4] Linux Mint,[5] Fedora[6] en openSUSE.[7]

Komponente

[wysig | wysig bron]

Die komponente van LibreOffice is dieselfde as dié van OpenOffice.org, en bestaan uit onder meer die volgende:

LibreOffice Writer is die woordverwerker in LibreOffice, met 'n soortgelyke funksie as dié van Microsoft Word of Word Perfect. Dit kan ook dien as 'n basiese WYSIWYG-redigeerder vir HTML.[8]

LibreOffice Calc is die sigbladprogram, soortgelyk aan Microsoft Excel of Lotus 1-2-3. Dit het 'n aantal unieke eienskappe, insluitend 'n stelsel wat outomaties 'n reeks grafieke definieer, gebaseer op beskikbare inligting vanaf die gebruiker.[9]

LibreOffice Impress is die voorleggingsprogram in die pakket, wat lyk en funksioneer soos Microsoft Powerpoint. Voorleggings kan uitgevoer word as PDF en ook SWF-lêers, wat hulle toelaat om besigtig te word op 'n rekenaar met Adobe Flash daarop geïnstalleer.

LibreOffice Base is die pakket se databasisprogram, soortgelyk aan Microsoft Access. LibreOffice Base laat die opstel en bestuur van databasisse toe, sowel as die voorbereiding van vorms en verslae wat gebruikers maklike toegang tot data verskaf. Soos Access, kan dit gebruik word as 'n front-end vir verskillende databasisstelsels, insluitend die Access-databasisse (JET), ODBC-databronne, en MySQL of PostgreSQL.

Geskiedenis

[wysig | wysig bron]

Op 28 September 2010 het verskeie lede van die OpenOffice.org-projek saamgekom om 'n nuwe groep genaamd die "Document Foundation" te stig. Die Document Foundation skep LibreOffice vanuit die OpenOffice.org-projek, oor kommer dat Oracle Corporation verdere ontwikkeling op die OpenOffice.org-projek sou staak, of beperkings sou plaas daarop as gevolg van die oopbron-aard daarvan, soos dit die geval was met die OpenSolaris-projek.

Daar is oorspronklik gehoop dat die LibreOffice naam tydelik sou wees.[10] Oracle is genooi om 'n lid van die Document Foundation te word, maar het die uitnodiging verwerp en weier om die OpenOffice.org naam te skenk aan die projek.[11] Oracle het ook verder daarop aangedring dat al die lede van die OpenOffice.org Gemeenskapsraad betrokke by die Document Foundation bedank uit die raad, met verwysing na 'n konflik van belange.[12]

As gevolg van die vertakking van OpenOffice.org na LibreOffice, en die gevolglike verlies van die ontwikkelaars, het Oracle in April 2011 aangekondig dat dit die kommersiële ontwikkeling van OpenOffice.org beëindiging het.[13]

Lêerformaat

[wysig | wysig bron]

Die lêerformaat van OpenOffice.org is deur die Organisasie vir die Bevordering van Gestruktureerde Inligingstandaarde (OASIS) as basis vir die nuwe uitruilformaat, OpenDocument, gebruik, wat ook die standaardformaat van LibreOffice is. Die XML-lêers is saamgepers. LibreOffice se voorganger, OpenOffice.org, het in Europa 'n aantal belangrike suksesse behaal; tans skakel steeds meer openbare Europese instellings oor na OpenOffice.org en LibreOffice.[14] So het die Franse polisie byvoorbeeld aangekondig dat hulle 80 000 lessenaarrekenaars van Microsoft Office na OpenOffice.org gaan migreer.[15] Die Europese Unie het ook beplan om die OASIS-dokumentformaat as amptelike norm voor te skryf, waarna alle owerhede in Europa verplig sal wees om hulle dokumente in hierdie formaat te stoor. Microsoft Office 2010 kan ook die ODF-lêerformaat lees en daarin stoor as gevolg van druk op Microsoft vanaf die Europese Unie.[16]

Sien ook

[wysig | wysig bron]

Verwysings

[wysig | wysig bron]
  1. ↑ x1sc0 (12 Desember 2024). "LibreOffice 25.2 Beta1 is available for testing" (in Britse Engels). Besoek op 12 Desember 2024.{{cite web}}: AS1-onderhoud: onerkende taal (link)
  2. ↑ http://wiki.documentfoundation.org/ReleasePlan
  3. ↑ http://blog.documentfoundation.org/2011/03/28/six-months-of-freedom-and-community/
  4. ↑ http://www.ubuntu.com/ubuntu/features/office-applications
  5. ↑ http://www.h-online.com/open/news/item/Linux-Mint-11-Katya-released-1250921.html
  6. ↑ http://fedoraproject.org/wiki/Features/LibreOffice
  7. ↑ http://news.opensuse.org/2011/03/07/opensuse-11-4-will-be-first-to-roll-out-with-libreoffice/
  8. ↑ en:The Document Foundation
  9. ↑ en:The Document Foundation
  10. ↑ http://developers.slashdot.org/story/10/09/28/143204/OpenOfficeorg-Declares-Independence-From-Oracle-Becomes-LibreOffice
  11. ↑ "argiefkopie". Geargiveer vanaf die oorspronklike op 1 November 2010. Besoek op 8 Junie 2011.
  12. ↑ http://arstechnica.com/open-source/news/2010/10/oracle-wants-libreoffice-members-to-leave-ooo-council.ars
  13. ↑ http://arstechnica.com/open-source/news/2011/04/oracle-gives-up-on-ooo-after-community-forks-the-project.ars
  14. ↑ http://filext.com/file-extension/ODF
  15. ↑ http://arstechnica.com/open-source/news/2009/03/french-police-saves-millions-of-euros-by-adopting-ubuntu.ars
  16. ↑ http://www.microsoft.com/presspass/press/2008/may08/05-21expandedformatspr.mspx
Ontsluit van "https://af.wikipedia.org/w/index.php?title=LibreOffice&oldid=2680420"