Greta Thunberg

d Greta Thunberg (2023)

D Greta Tintin Eleonora Ernman Thunberg [ˈgreːta ˈtʉːnˌbærj]^ⓘ (* 3. Jänner 2003 z Stockholm) isch e schweedischi Klimaschutzaktivisti. Si isch internationaal bikannt wore, well si afange het för de Klimaschutz z straike, statt i d Schuel z goo. Erem Biispill sind mittlerwiile vili Schüeller und Schüellerine gfolgt, so ass drususe e weltwiiti Biwegig entstanden isch, wo i de Tütschschwitz Klimastraik gnennt werd, im Weltsche Grève du Climat, z Tütschland und in anderne Länder aber Fridays For Future („Frittig für d Zuekumpft“). 2019 het si för ires Engagement de Alternativ Nobelpriis öbercho.

s Lebe

D Greta Thunberg isch d Töchter vo der Ooperesengeri Malena Ernman und em Schauspiller Svante Thunberg. Nochdem d Greta i de Grundschuel vo der Erderwärmig ghört hett, hett si afange dihai Energii spare und hett o agfange vegaan zesse und si het o uffghöört mit em Flugi umezraise. Debi het si o eri aigni Famili öberzügt. Mit Elfi isch si depressiv woore und het nöme wöle rede und esse. En Arzt het den bi ere s Asperger-Syndrom diagnostiziert. Mit föfzeni het si denn demit aagfange, em Frittig, statt i d Schuel z goo, för s Klima straike. Dör da isch si weltwiit bikannt wore und isch im Dezember 2018 zo de UN-Klimakonferenz z Kattowitz igladt wore und im Jäner 2019 het si am Weltwertschaftsforum z Davoos e Reed ghalte. Im September vom gliiche Johr isch si mit eme Sägelschiff, möglichscht klimaneutral, uf Amerika öberi gfahre. Am 23. September hät si dänn bim Klimagipfel bi de UNO z New York zerscht di dütschi Bundeskanzleri Angela Merkel zum e Gsprööch troffe und nocher hät si vor de rund 60 Staats- und Regierigsschäfs e Reed ghalte. Si hät mit emozional uufgwüelte Wort di Versammlete ufgforderet, sich mee för de Schutz vom Klima iizetze und hät ene vorgworfe, si tögid eri Generazion im Stich loo.

d Uuswörkige

d Greta Thunberg vor em schwedische Parlamäntsgeböü z Stockholm am 27. Augste 2018

Em 20. Augste 2018, em erste Schueltaag noch de Summerfeeri, isch d Greta Thunberg zerstmool mit eme Schild mit de Uufschrift ‘Skolstrejk för klimatet’ („Schuelstraik för s Klima“) vor der Schwedisch Riichstaag gsesse, wege de grosse Hitz und ussergwöönliche Tröchni im Summer 2018. Die Anzelaktion isch nöd grad gutiert woore, aber bald hend sich anderi Schüeller und Schüellerine ere aagschlosse.

I de Schwitz hend as ersti d Gymeler vo de Kanti Sanggale am ene Frittig (21. Dezember 2018) för de Klimaschutz gstraikt.

Kritik

2023, wo d Hamas mit Terroraaschlääg Israel aaggriffe und Israel mit em Militär zrogggschlage hät, hät sich d Greta Thunberg ganz aisittig mit de Palästinenser solidarisiert. Das hät ere vill nazionaali und internazionaali Kritik iiproocht.

Weblink

 Commons: Greta Thunberg – Sammlig vo Multimediadateie

• d Website vo de Greta Thunberg
• d Reed uf de UN-Klimakomferänz z Kattowitz (dütsch): Text und Video