Брэд Фрыдэль

Брэд Фрыдэль
Bradley Howard Friedel
Пэрсанальная інфармацыя
Нарадзіўся	18 траўня 1971 (53 гады) Лэйквуд, Агаё, ЗША
Рост	188 см
Вага	91 кг
Пазыцыя	брамнік
Моладзевыя клюбы
1990—1992	Каліфарнійскі ўнівэрсітэт
Клюбы
Гады	Клюб	Гульні (галы)¹
1995 1995—1996 1996—1997 1997—2000 2000—2008 2008—2011 2011—2015	Брэнбю Галатасарай Каламбус Кру Лівэрпул Блэкбэрн Ровэрз Астан Віла Тотэнгэм Готспур	10 (0) 30 (0) 38 (0) 25 (0) 287 (1) 114 (0) 50 (0)
Зборныя
1992—2005	ЗША	82 (0)

Брэдлі Гаўард Фрыдэль (па-ангельску: Bradley Howard Friedel; нарадзіўся 5 траўня 1971 году ў Лэйквудзе, штат Агаё) — амэрыканскі футбольны гулец, брамнік. На яго рахунку 82 гульні ў складзе нацыянальнай каманды ЗША ў пэрыяд з 1992 па 2005 год, падчас якога абараняў гонар сваёй радзімы на трох чэмпіянатах сьвету. Таксама ён валодае рэкордам у Прэм’ер-Лізе па колькасьці матчаў праведзеных запар, якіх налічваецца 215.

Юнацтва

Калі Брэд быў юнаком ён займаўся акрамя футболу яшчэ й баскетболам і тэнісам. Але нягледзячы на тое, што відавочныя посьпехі меліся ва ўсіх з гэтых кірункаў, хлапец вырашыў сканцэнтравацца на футболе. Першапачаткова Фрыдэль гуляў на пазыцыі нападніка, але зь цягам часу перакваліфікаваўся ў брамнікі. Фрыдэль гуляў за каманду ўнівэрсітэту Каліфорніі, які знаходзіцца ў Лос-Анджэлесе, і ўдзельнічаў у спаборніцтвах NCAA. У 1991 і 1992 гадах Брэд быў уключаны ў сымбалічны сьпіс лепшых гульцоў сярод унівэрсітэтаў.

Прафэсійная кар’ера

Першыя гады

Скончыўшы навучаньне ва ўнівэрсітэце Брэд распачаў прафэсійную кар’еру й адразу ж зьявіўся варыянт з «Нотынггэм Форэст», але атрымаць неабходныя дакумэнты для працы ў Брытаніі яму не ўдалося. Брэд, каб ня страчваць форму заключыў кантракт з Амэрыканскай фэдэрацыяй па футболе й пачаў падрыхтоўку да Чэмпіянату сьвету 1994 году. Пасьля Чэмпіянату сьвету зноўку зьявіўся варыянт з Ангельшчынай, на гэты раз Кевін Кіган заклікаў футбаліста да сябе ў «Ньюкасл Юнайтэд», але Брэду было адмоўлена ў працоўнай візе каторы ўжо раз. Але Фрыдэль усё ж такі апынуўся ў Эўропе, падпісаўшы дамову з дацкім клюбам «Брондбю». На наступны год Фрыдэль зьехаў у ЗША, каб пачаць падрыхтоўку да Кубка Амэрыкі й Кубка ЗША. Пасьля двух турніраў Брэд мог зьявіцца ў складзе «Сандэрлэнду», але зноў ня змог атрымаць працоўную візу. Брэд пераехаў у Турэччыну, каб гуляць за «Галатасарай», які ацаніў футбаліста ў 1,1 мільёну даляраў. Турэцкі клюб на той момант трэніраваў Грэмі Соўнс, будучы трэнэр Брэда па «Блэкбэрн Ровэрз». Улетку 2006 году Фрыдэль вярнуўся на радзіму й увайшоў у склад клюбу «Каламбус Кру» ў чэмпіянаце МЛС. Спачатку Брэд сядзеў на лаўцы, але напрыканцы сэзону ўжо выходзіў на поле. А на наступны сэзон стаў лепшым брамнікам чэмпіянату й увайшоў у сымбалічны сьпіс розыгрышу.

Лівэрпул

У 1997 годзе «Лівэрпул» выкупіў кантракт Брэда за 1,7 мільену даляраў. У сьнежні «Лівэрпул» атрымаў працоўную візу для Брэда з другой спробы. Фрыдэль дэбютаваў у ангельскай Прэм’ер-Лізе 28 лютага 1998 году. Але за тры гады праведзеных у складзе «чырвоных» Брэд згуляў толькі 30 матчаў.

Блэкбэрн Ровэрз

У 2000 годзе Фрыдэль вольным агентам прымкнуў да «Блэкбэрн Ровэрз», які на той час трэніраваў стары знаёмы Брэда па Турэччыне Грэмі Соўнс. Футбаліст адразу трапляе ў асноўны склад, дзякуючы сваёй надзейнай гульні. Клюб на наступны год вяртаецца ў Прэм’ер-Лігу. Падчас гульні ў фінале Кубка Лігі ў 2002 супраць «Тотэнгэм Готспур» Брэд быў вызначаны як лепшы гулец матча. Значную ролю выканаў Фрыдэль і ў сэнсацыйных выязных перамогах Ровэрз над «Арсэналам» і «Фулгэмам». А пасьля фэнамэнальнай гульні супраць «Саўтгэмптану» быў празваны Супэрмэнам. На прыканцы сэзону 2002—2003 быў абраны ў сьпіс лепшых 11 гульцоў лігі з-за 15 матчаў, якія Брэд адстаяў на нуль. У тым жа годзе атрымаў узнагароду як лепшы гулец клюбу. 21 лютага 2004 у гасцявой гульні з «Чарлтанам Атлетыкам» забіў гол на апошніх хвілінах мачта й зрабіў лік 2:2, але «Чарлтан» усё ж такі вырваў перамогу зь лікам 3:2. Ён стаў другім галкіпэрам у гісторыі Прэм’ер-Лігі пасьля Пэтара Шмайхэля хто забіваў галы. У 2006 годзе Брэд у гульні супраць «Шэфілда Юнайтед» адбіў два пэнальці й зрабіў шмат сэйваў падчас матча. Гульня скончылася зь лікам 0:0, а Фрыдаль быў абраны лепшым гульцом. За 5 сэзонаў Брэд прапусьціў толькі некалькі гульняў. 14 красавіка 2006 Фрыдэль паставіў свой подпіс пад новым кантрактам з клюбам. А праз два гады 5 лютага 2008 ізноўку працягнуў пагадненьне, але гэта не стала яму перашкодай і напрыканцы сэзону апынуўся ў «Астан Віле».

Астан Віла

25 ліпеня Фрыдэль перайшоў у «Астан Вілу», падпісаўшы з клюбам кантракт на тры гады. Брэд абышоўся бірмінгэмскаму клюбу ў 2,5 мільёнаў даляроў. Акрамя «Вілы» намер аб куплі амэрыканца выказваў яшчэ й «Манчэстэр Сіці». Першую гульню за новы клюб Брэд правёў у матчы Кубка Інтэртота супраць «Одэнсэ», выйшаўшы на зьмену ў другім тайме. Паўнавартасны ж дэбют футбаліста адбыўся 2 жніўня ў гасьцявой гульні з «Рэдынгам», дзе ўжо на дзясятай хвіліне Брэд адбіў пэнальці.

Тотэнгэм Готспур

Кантракт Фрыдэля з «Астан Вілай» скончыўся пасьля сэзону 2010—2011 гадоў. 3 чэрвеня 2011 году «Тотэнгэм» абвесьціў, што яны падпісалі з Фрыдэлем двухгадовую дамову. 22 жніўня 2011 году Фрыдэль дэбютаваў у стане новага клюбу ў матчы супраць «Манчэстэр Юнайтэд» на Олд Трафард.

Міжнародная кар’ера

Фрыдэль трэці галкіпэр зборной ЗША па колькасьці праведзеных гульняў пасьля Кэйсі Кэлера й Тоні Мэолы. Дэбютаваў у зборнай у 1992 годзе ў гульні супраць Канады, захаваўшы сваю браму ад галоў. Удзельнічаў у Алімпійскіх гульнях 1992 году ў Барсэлёне. Значыўся другім брамнікам на чэмпіянаце сьвету 1994, на наступным чэмпіянаце сьвету ў Францыі правёў адну гульню, у якой ЗША саступіла камадзе Югаславіі зь лікам 1:0. На сваім трэцім чэмпіянаце сьвету ў Японіі й Паўднёвай Карэі быў ужо першым брамнікам. Каманда ЗША дайшла да чвэрцьфіналу, саступіўшы камандзе Нямеччыны. Падчас гэтага чэмпіянату Брэд адбіў два пэнальці, за што быў празваны аматарамі «Чалавек-сьцяна». 7 лютага Фрыдэль аб’явіў аб заканчэньні сваёй міжнароднай кар’еры.

Асабістае жыцьцё

Брэд і яго жонка Трэйсі Фрыдэлі маюць дзьвюх дачок: Ізабэлу й Алегру. Зьяўляецца аматарам клюбу амэрыканскага футболу «Кліўлэнд Браўнз».

Дасягненьні

• Уладальнік Кубка Турэччыны: 1996
• Уладальнік Кубка лігі Ангельшчыны: 2002

Вонкавыя спасылкі

Брэд Фрыдэль — сховішча мультымэдыйных матэрыялаў

• Статыстыка Брэда Фрыдэля на сайце Soccerbase