မိဉ်ႏခံႏထူႏပအိုဝ်ႏခမ်း

"မိဉ်ႏခံႏထူႏ ပအိုဝ်ႏခမ်းသားအတာႏနဝ်ꩻ အဝ်ႏလိုႏလွောင်ႏဗူႏဗာႏဒျာႏ" ဟန်ႏသနီꩻ ပအိုဝ်ႏနုဲင်ႏငံႏရေꩻရုဲင်ꩻတသွိုးမု ပအိုဝ်ႏကို ခုမ်စူခြွိုင်းစွိုꩻအနေႏ မိဉ်ႏထွားနဝ်ꩻ အဝ်ႏပအိုဝ်ႏစွိုးခွိုꩻလွစ်ထန်ႏရေꩻအစွိုꩻချုတ် (PNLO)သွူ၊ ပအိုဝ်ႏစွိုးခွိုꩻ လွစ်ထန်ႏရေꩻအစွိုꩻချုတ်ယို မန်းခမ်းငိမ်ꩻချံꩻရေꩻ ထာꩻမာꩻရဲဉ်ႏကို တွမ်ႏအစိုႏရ အွဉ်ငါစဲ့ꩻတပ်မတောႏ ကတဲမ်းထွို့ꩻဒါႏ အွဉ်ႏဆွိုးအတွိုက်ꩻအခꩻ (NCA)လိတ်ချုပ် ခမ်းရင်ꩻသားခုစူခြွိုင်း(၈)စွိုꩻအကို အဝ်ႏပါသော့ꩻနဝ်ꩻသွူ။ ဟန်ႏသနီꩻ နုဲင်ႏငံႏရေꩻရုဲင်ꩻတသွိုးမု ပအိုဝ်ႏကို မဉ်ႏနုဲင်းနုဲင်းငံႏရေꩻပါတီစွိုꩻအနေႏ မဉ်ႏထွားနုဲင်း အဝ်ႏပအိုဝ်ႏစွိုးခွိုꩻအစွိုꩻချုတ် (PNO)တွမ်ႏ ခမ်းပေါင်ꩻဗူႏပအိုဝ်ႏစွိုးခွိုꩻအစွိုꩻချုပ် (ပ-အ-မ-ဖ)ယိုနီပါနဝ်ꩻသွူ။ နဝ်ꩻမꩻ ခုမ်စူခြွိုင်း ပအိုဝ်ႏစွိုးခွိုꩻလွစ်ထန်ႏရေꩻအစွိုꩻချုတ် (PNLO)စဲ့ꩻစွိုꩻတဲ့နဝ်ꩻ၊ နုဲင်ႏငံႏရေꩻပါတီ ပအိုဝ်ႏစွိုးခွိုꩻအစွိုꩻချုတ် (PNO)တွမ်ႏ ခမ်းပေါင်ꩻဗူႏပအိုဝ်ႏစွိုးခွိုꩻအစွိုꩻချုတ် (ပ-အ-မ-ဖ)ပါတီသီးတဲ့နဝ်ꩻ ဟန်ႏသနီꩻ ကအဝ်ႏမာꩻလွေꩻဒါႏ ခမ်းပေါင်ꩻဗူႏငိမ်ꩻချံꩻရေꩻညီႏလာႏခံႏ ၂၁-ရျာꩻဗူႏပင်ႏလုံတွမ်ႏ အမျိုꩻသာꩻအရန်း အုံကွမ်နုဲင်ႏငံႏရေꩻပွယ်ꩻကို ပါဝင်ႏထင်ႏခွင်ꩻ၊ နွို့အုံကွမ်ခွင်ꩻ၊ အွဉ်ငါမာꩻခွင်ꩻအဝ်ႏလꩻ ဗိုန်ပီနုဲင်းနုဲင်းဝင်ꩻနဝ်ꩻသွူ။ ခမ်းပေါင်ꩻဗူႏညီႏလာႏခံႏ ပွယ်ꩻတဖြုံႏမဉ်ႏဆွိုးအခါႏကို ကအဝ်ႏလိုႏသဲင်ꩻမာꩻချာဒါႏ အမျိုꩻသာꩻအရန်း အုံကိုမ်ပွယ်ꩻယို ခုမ်စူခြွိုင်းစဲ့ꩻစွိုꩻတဲ့နဝ်ꩻ၊ တရာꩻဝင်ႏနုဲင်ႏငံႏရေꩻပါတီစွိုꩻတဲ့နဝ်ꩻ အွဉ်မာꩻနွောင်ꩻဒျာႏကရိုꩻယို အုံကိုမ်နုဲင်ႏငံႏရေꩻမူဘောင်ကို အဝ်ႏပါနဝ်ꩻသွူ၊ တရာꩻဝင်ႏနုဲင်ႏငံႏရေꩻပါတီစွိုꩻယို အွဉ်မာꩻနွောင်ꩻဒျာႏတဲင် လꩻအနွောင်ꩻနုဲင်ႏငံႏရေꩻပါတီဖုံႏမꩻမွေးတဝ်း (PNO)ပါတီတဲ့ အွဉ်မာꩻနွောင်ꩻဒျာႏ၊(ပ-အ-မ-ဖ)ပါတီတဲ့ အွဉ်မာꩻနွောင်ꩻဒျာႏ၊ (PNLO)ခုစူခြွိုင်းစဲ့ꩻစွိုꩻတဲ့ အွဉ်မာꩻနွောင်ꩻဒျာႏနဝ်ꩻသွူ။ ဟန်ႏသနီꩻ ပအိုဝ်ႏကအဝ်ႏမာꩻနေဒါႏ ဝေင်ꩻနယ်ႏအလွောက်ꩻ အုံကိုမ်နုဲင်ႏငံႏရေꩻပွယ်ꩻဖုံႏယိုနဝ်ꩻ ပအိုဝ်ႏစွိုးခွိုꩻအရန်း (ပအိုဝ်းအမျိုးသားအဆင့်)အုံကိုမ်နုဲင်ႏငံႏရေꩻပွယ်ꩻလꩻတွိုႏတဝ်းဒွုန်းနဝ်ꩻသွူ၊ ထွာဒျာႏပအိုဝ်ႏစွိုးခွိုꩻအရန်း အုံကိုမ်ပွယ်ꩻတာႏ မော့ꩻခွဲးခြုဲင်းဖြောင်နယ် ပအိုဝ်ႏခမ်းသားမွိုးဖါ ခမ်းထီကို ကအဝ်ႏမာꩻငိမ်ꩻချံꩻရေꩻထာꩻမာꩻရဲဉ်ႏခရာႏနဝ်ꩻသွူ။ ထွာဒျာႏ ပအိုဝ်ႏစွိုးခွိုꩻအရန်း အုံကိုမ်ပွယ်ꩻတာႏ မာꩻအွဉ်ရီးအုံကိုမ်ပွယ်ꩻအနေႏ ဖျင်ဆင်ခါꩻအရန်းဒျာႏနဝ်ꩻသွူ၊ ယိုခါ ကအဝ်ႏမာꩻဒါႏ နယ်ႏအလွောက်ꩻမာꩻအွဉ်ရီး အုံကိုမ်ပွယ်ꩻယို ပအိုဝ်ႏတစွိုးခွိုꩻလုမ်းအနေႏ ဖြွမ်းဗူႏလို့လဲဉ်းဟောင်း၊ ပါဝင်ႏလို့လဲဉ်းဟောင်း၊ မာꩻအွဉ်ရီးအုံကိုမ်ပွယ်ꩻအရန်းကို မဉ်ႏတဖြွမ်းဗူႏနွောင်ꩻတဝ်းဒွုန်း၊ မဉ်ႏတပါဝင်ႏလို့နွောင်ꩻတဝ်းဒွုန်းနဝ်ꩻ မဉ်ႏတွိုႏငါထဲင်း စွိုးခွိုꩻအရန်း (အမျိုးသားအဆင့်)အုံကိုမ်ပွယ်ꩻနဝ်ꩻ အီႏဖြွမ်းနုဲင်းမုဲင်ꩻ။ နုဲင်းယိုခါ ကမာꩻလဲဉ်းသားတဲ့ အဝ်ႏမာꩻလဲဉ်း၊ လꩻပါလွဉ်ဒွုန်းသားတဲ့ အဝ်ႏကုဲင်က၊ နာꩻပါတဝ်းလဲ့ ပါတဝ်းဒျာႏ၊ နီမာꩻတဲ့ နီမာꩻဒျာႏ၊ သီမာꩻတဲ့ သီမာꩻဒျာႏ၊ ခွေပါတဝ်းလဲ့ ပါတဝ်းဒျာႏနုဲင်းနဝ်ꩻနဝ်ꩻ အခိန်ႏနုဲင်းယိုခါ အဝ်ႏလိုႏထွာသင်ꩻတဝ်းဒွုမ်သွူ။ မဉ်ႏထွားချာ ၁၉၄၇-၁၉၇၄ ၂၀၀၈-မန်းခမ်းထီအပြောင်ꩻအလုဲင်ႏ အဆွုမ်ႏကိုနဝ်ꩻ ပအိုဝ်ႏစွိုးခွိုꩻလိုꩻမျိုꩻ နစ်နာႏဗာႏအလဲင်ႏပေါင်ꩻအာလဲဉ်းသွူ။ ပအိုဝ်ႏစွိုးခွိုꩻလွစ်ထန်ႏရေꩻအစွိုꩻချုတ် (PNLO)အနေႏလဲ့ ခံႏထူႏဒျာႏ ပအိုဝ်ႏစွိုးခွိုꩻခမ်းသားအတာႏ၊ ပအိုဝ်ႏစွိုးခွိုꩻအစွိုꩻချုတ် (PNO)နဝ်ꩻလဲ့ ခံႏထူႏဒျာႏ ပအိုဝ်ႏစွိုးခွိုꩻခမ်းသားအတာႏ ခမ်းပေါင်ꩻဗူႏ ပအိုဝ်ႏစွိုးခွိုꩻအစွိုꩻချုတ် (ပ-အ-မ-ဖ)လဲ့ ခံႏထူႏဒျာႏပအိုဝ်ႏစွိုးခွိုꩻ ခမ်းသားသီးအတာႏ အစွိုꩻယိုဖုံႏနဝ်ꩻ ကမာꩻထာꩻမာꩻ ကမာꩻနုဲင်ႏငံႏရေꩻယို ခံႏထူႏဒျာႏပအိုဝ်ႏစွိုးခွိုꩻ ခမ်းသားအတာႏလွဉ်းလွဉ်းနဝ်ꩻသွူ။ ပအိုဝ်ႏခမ်းသားယိုနဝ်ꩻ အခိန်ႏမုဲင်ꩻခါတဲ့ယဝ်း အဝ်ႏလွောင်ႏဗူႏ၊ အဝ်ႏဖြွမ်းဗူႏထွူဒျာႏသွူ၊ မိဉ်ႏထားနုဲင်းယိုနဝ်ꩻ ပအိုဝ်ႏခမ်းသားယို အကျွိုက်ထာꩻဖြွမ်းဗူႏ အစွယ်ꩻထာꩻလွောင်ႏဗူႏနဝ်ꩻ ထီႏသေဗာႏသွူ။ ကွယ်ႏတွော့ꩻ အစွိုꩻကီယိုဖုံႏ ကအဝ်ႏမာꩻနေးလဲဉ်းဒါႏ မာꩻအွဉ်ရီးနုဲင်ႏငံႏရေꩻအုံကိုမ်ပွယ်ꩻယို အစွိုꩻပငါပရာꩻ ခံႏထူႏထွူလဲဉ်းဒျာႏ ပအိုဝ်ႏခမ်းသား သဘောꩻထာꩻဟောင်း၊ နာꩻအစွိုꩻကအဝ်ႏမာꩻငါ၊ ခွေအစွိုꩻကအဝ်ႏကုဲင်ချာဗာႏထာꩻဖုံႏယိုလဲ့ ခံႏထူႏဒျာႏ ပအိုဝ်ႏခမ်းသားအတာႏ မာꩻလွေꩻဟောင်း။