Prifysgol Leipzig

Prifysgol Leipzig

Arwyddair	Aus Tradition Grenzen überschreiten
Math	prifysgol gyhoeddus, cyhoeddwr mynediad agored, comprehensive university, university of applied sciences
Sefydlwyd	2 Rhagfyr 1409
Daearyddiaeth
Sir	Leipzig
Gwlad	Yr Almaen
Cyfesurynnau	51.3387°N 12.378728°E
Sefydlwydwyd gan	William II, Margrave of Meissen
Ffeiliau perthnasol ar Comin

Prifysgol gyhoeddus yn yr Almaen yw Prifysgol Leipzig (Almaeneg: Universität Leipzig) a leolir yn Leipzig yn nhalaith Sacsoni. Hon ydy'r brifysgol hynaf yn yr Almaen, ond am Heidelberg, ac un o'r prifysgolion hynaf yn Ewrop.

Sefydlwyd Prifysgol Leipzig ym 1409 gan fyfyrwyr ac athrawon Almaenig a symudodd o Brifysgol Prag, wedi i Václav IV, brenin Bohemia, drosglwyddo rheolaeth dros y brifysgol i'r Tsieciaid. Cydnabuwyd Prifysgol Leipzig gan bwl pabyddol ym 1409. Daeth dan ddylanwad y Diwygiad Protestannaidd ym 1539.

Yn y 18g a'r 19g datblygodd yn un o brifysgolion blaenaf Ewrop, yn enwedig o ran ysgolheictod llenyddol a diwylliannol. Ymhlith yr athrawon o nod oedd y damcaniaethwr llenyddol Johann Gottsched, ac mae cyn-fyfyrwyr y brifysgol yn cynnwys y mathemategydd Gottfried Liebniz, yr athronydd Johann Fichte, y llenor Johann Wolfgang von Goethe, a'r cyfansoddwr Richard Wagner.

Aildrefnwyd y brifysgol ym 1946, ac ym 1953, dan reolaeth Gweriniaeth Ddemocrataidd yr Almaen (DDR), newidiodd ei henw yn swyddogol i Brifysgol Karl Marx Leipzig. Yn sgil cwymp y DDR ym 1990, adferwyd yr hen enw.

Rhennir y brifysgol yn gyfadrannau economeg, y gyfraith, athroniaeth, hanes, gwyddor gwleidyddiaeth, astudiaethau diwylliannol, ieithyddiaeth ddamcaniaethol a chymhwysol, y gwyddorau, mathemateg a chyfrifiadureg, a meddygaeth.