Abdelmalek Sayad

C'l artìcol chè 'l è scrit in Carpśàn

Abdelmalek Sayad (Beni Djellil, 1933 – Parì, 13 ed mèrs 1998) 'l è stê 'n sociòlog algerèin, diretōr ed risérca a 'l CNRS e a l’École des hautes études en sciences sociales (EHESS), asistèint ed Pierre Bourdieu.

Biografìa

Abdelmalek Sayad al nas a Aghbala, un comùn ed Beni Djellil in dla Cabìlia, regiòun bèrbera dal nord edl'Algerìa, ùnic masć da mèś a ètri quàter surèli. Al taca a 'ndèr a scóla in dal só vilàǵ ch'al gh'à sèt an e più terdi 'l andrà a studdièr in dal licèo ed Béjaïa. Quand al taca a 'ndèr a l'Universitê 'd Algéri, 'l incòuntra Pierre Bourdieu ch'l avrèv ispirê dimòndi só ragionamèint in di tèimp a vgnìr.
In dal 1963, Sayad al và a stèr in Fransa. Prìma precàri a 'l Centre de sociologie européenne ed l’École des hautes études en sciences sociales (EHESS), in dal 1977 al dvèinta pò diretōr dla risérca in sociologìa a 'l Centre national de la recherche scientifique (CNRS).
Ala só mort, só mujéra Rebecca Sayad, la cunsgnèva i archìvi dal studiōś ala Cité nationale de l'histoire de l'immigration ed Parì.

Soquànt pinsér dal studiōś

Sayad al stùddia, insèm a 'l só profesōr Bordieux, in na manéra calèda dèintr in dla stòria edl'ùltem sécol dla coloniśasiòun francéśa edl'Algerìa, che i emigrê algerèin i nn'ìn minga seimper cunpàgn in dal tèinp, che sociologicamèint a nn es pòsa minga vèdri in na manéra generaliśèda, mo invéci ch'i gh'àpien dal caraterìstichi 'd adatamèint e 'd śvilùp lavoratìv e socèl diferèint a secònda dal vicèndi stòrichi sucèsi tra i du Paēś ed lung i decèni.
In dal só lìber La double absence, Sayad al dìś che i algerèin i lasen dal vōd in dal só Paéś ch'i partìsen vìa, mèinter che anca in dal Paéś indû i finìsen, per forsa la srà dimòndi dura ed sintìrs a cà, che i agìnt lè 'd lung la nn'è minga dìta ch'i gh'lasen viver facil al só trasferimèint lè.

Vōś lighèdi

imigrasiòun

Soquànti só publicasiòun

(FR) Con Pierre Bourdieu, Le Déracinement. La crise de l'agriculture traditionnelle en Algérie, Parì, Les Éditions de Minuit, 1964
(FR) L'Immigration, ou les paradoxes de l'altérité, ed. De Boeck Université, 1992
(FR) Un Nanterre algérien, terre de bidonvilles, ed. Autrement, 1998
(FR) Con Alain Gillette, L'Immigration algérienne en France, Parì, ed. Entente, 1976
(FR) La Double Absence. Des illusions de l'émigré aux souffrances de l'immigré. Parì, Seuil, coll. « Liber », 1999, descargàbil in dla réda
(FR) Histoire et recherche identitaire, con 'n Entretien avec Hassan Arfaoui, Bouchène, 2002
(IT) Algeria: nazionalismo senza nazione, ed. Mesogea, 2003
(FR) L'Immigration ou les paradoxes de l'altérité, nóva edisiòun, Parì, ed. Raisons d'agir
(FR) L'illusion du provisoire, 2006
(FR) Les Enfants illégitimes, 2006
(FR) La Fabrication des identités culturelles, 2014, prefasiòun 'd Amin Pérez
(FR) L'École et les enfants de l'immigration, essais critiques, Parì, Seuil, La couleur des idées, 2014

Noti e referèinsi

Colegamèint estèren

(FR) Un sunt ed soquànt só pinsér in dal sit persee.fr.