Herman Van Rompuy
| Herman Van Rompuy | |
|---|---|
 | |
| Gebuertsnumm | Herman Achille Van Rompuy |
| Gebuer |
31. Oktober 1947 Etterbeek |
| Nationalitéit | Belsch |
| Educatioun |
Kathoulesch Universitéit vu Léiwen, Katholieke Universiteit Leuven |
| Aktivitéit | Politiker, Ekonomist |
| Partei | Europäesch Vollekspartei |
 | |
Den Herman Van Rompuy, gebuer den 31. Oktober 1947 zu Etterbeek, ass e flämesche Politiker (Christen Democratisch en Vlaams, CD&V).
Den Herman Van Rompuy war, no sengem Philosophie- an Ekonomiestudium zu Léiwen, tëscht 1972 bis 1975 Attaché bei der Belscher Nationalbank. Duerno gouf e Conseiller vum Premierminister Leo Tindemans (1975–1978) a vum Finanzminister Gaston Geens (1978–1980). Vun 1980 bis 1988 war en Direkter vum Centrum voor Politieke, Economische en Sociale Studies. Hien huet bis 1987 Coursen op der Héichschoul fir Commerce zu Antwerpen, a vun 1982 un och op der Vlaamse Economische Hogeschool Brussel ginn.
Vun 1988 bis 1993 war hie President vun der CVP, der Virgängerpartei vun der CD&V. Vun 1993 bis 1999 war e Vizepremier a Budgetsminister an der Federaler Regierung.
Am Juni 1999, huet d'CVP missen an d'Oppositioun. Den Herman van Rompuy war zanterhier Deputéierte vum nationale Parlament, a gouf den 12. Juli 2007 President dovun. 2004 krut hien den Éierentitel "Ministre d'État".
Nodeem dem Yves Leterme seng Regierung no e puer Méint auserneegebrach war, gouf de Van Rompuy den 30. Dezember 2008 vum Kinnek Albert II. als 48. belsche Premierminister vereedegt. Hie blouf dat bis den November 2009 a gouf dann, den 19. November 2009 éischte permanente President vum Europäesche Conseil. Den 1. Dezember 2014 gouf den Donald Tusk säin Nofollger als Conseilspresident.
Den Herman Van Rompuy ass de Brudder vum Eric Van Rompuy, dee vun 1995 bis 1999 de Ministeschportefeuille vun der Ekonomie, de PME'en, der Landwirtschaft an de Medien an der flämescher Regierung hat, a vun der Syndikalistin Tine Van Rompuy.
Hien ass bestuet a Papp vu véier Kanner.
Publikatiounen
[änneren | Quelltext änneren]- De kentering der tijden, Lannoo, Tielt 1979, ISBN 90-209-0788-3
- Hopen na 1984, Davidsfonds, Löwen 1984, ISBN 90-6152-194-7
- Het christendom. Een moderne gedachte, Davidsfonds, Löwen 1990, ISBN 90-6152-584-5
- Vernieuwing in hoofd en hart. Een tegendraadse visie, Davidsfonds, Löwen 1998, ISBN 90-6152-688-4
- De binnenkant op een kier. Avonden zonder politiek, Lannoo, Tielt 2000, ISBN 90-209-4002-3
- Dagboek van een vijftiger, Davidsfonds, Löwen 2004, ISBN 90-5826-301-0
| Commons: Herman Van Rompuy – Biller, Videoen oder Audiodateien |
Um Spaweck
[änneren | Quelltext änneren]- Offiziell Homepage (nl)