Conservalisme

Conservalisme es un ideolojia political e sosial cual promove la sosia tradisional en la contesto de cultur e sivilia. La prinsipes sentral de conservalisme inclui tradision, la imperfetia de umanas, un sosia organical, ierarcia e autoria, e la diretos de posese. Conservalistes intende conserva instituis como monarcia, la aristocratia, relijiontradisional, governa par un parlamento, e diretos de posese, con la gol de asentua la stablia e continui sosial. La formas plu estrema oposa modernisme e vole reveni a la sosia de un eda pasada.

La usa prima de la terma en un contesto political ia es en 1818 par François-René de Chateaubriand en la periodo de la Restora Bourbon, cual desira un reveni a la politicas ante la Revolui Franses. Istorial asosiada con la politicas de la destra, la nom ia es usada per descrive un estende grande de vistas: On no ave un colie singular de politicas regardada como conservaliste car la sinifia de conservalisme depende de cual es videda como tradisional en un loca e periodo spesifada. Conservalistes de partes diferente de la mundo - cada person suportante sua tradisiones propre - pote desacorda sur multe cosas. Per esemplo, Edmund Burke, un politiciste de la sentenio 18, ia oposa la Revolui Franses ma ia suporta la Revolui American, ma es videda como un de la teoristes major de conservalisme en Britan en la desenio de 1790.

Seguente Quinin Hogg, la presidente de la Partito Conservaliste Brites en 1959 "Conservalisme no es un filosofia ma plu un disposa mental, un forsa constante, presentente un funsiona eterna en la developa de un sosia libre, e corespondente a un nesesia profunda e permanente de la natur de umanas mesma." A la otra lado, alga teoristes political como Corey Robin, defini conservalisme como la defende jeneral de nonegalia sosial e economial.