Fluid

As Fluiden warrt in de Physik faken de Gasen un de Fletigkeiten tohopenfaat, vunwegen dat veele physikalsche Gesetten op beide Phasen todrapen doot. Jemehr Egenschoppen ünnerscheedt sik dorbi faken blots in de Gröttenorden (quantitativ), nich aver in’n grundsätzlichen Tosamenhang (qualitativ).

Fluide warrt op Grund jehmer Egenschoppen ünnerdeelt in newtonsche Fluiden un in nich-newtonsche Fluiden. De Ünnerscheed twüschen de beiden liggt bi dat Fleetverhollen, wat dör den funktischonellen Tosamenhang vun Schuuv-/Scheerspannung un de Tarren- oder Scheersnelligkeit kenntekent is.

De newtonschen Fluiden un jemehr Bewegen un Egenschoppen warrt in de Physik tomeist mit de Stroommechanik ünnersocht un beschreven. De Nich-newtonschen Fluiden sünd Saak vun de Rheologie.