Toshihide Masukawa

Toshihide Masukawa (2008)

Toshihide Masukawa (japaansch: 益川 敏英}}, Masukawa Toshihide; of un to ok Maskawa romaniseert; * 7. Februar 1940 in Nagoya, Präfektur Aichi; † 23. Juli 2021) weer en japaansch Physiker, de dör sien Arbeiten an de CP-Verletzung bekannt is. He kreeg 2008 den Nobelpries för Physik.

Leven un Wark

1962 kreeg Masukawa sien Studienafsluss an de Universität Nagoya, 1967 hett he sien Dokterteitel kreegen. Ansluutend weer he dor Assistent, af 1970 an de Universität Kyōto. 1976 wessel he för en Assistenzprofessur an dat Institut för Nuklearforschung vun de Universität Tokyo. Af 1980 weer he Perfesser an dat Yukawa-Institut för Theoretische Physik vun de Universität Kyōto, dat he van 1997 bit 1999 leiten dee. Siet 2003 lehrt Masukawa an de Sangyō-Universität Kyōto.

Sien Artikel CP Violation in the Renormalizable Theory of Weak Interaction, den he tosommen mit Makoto Kobayashi schreev, weer luut SPIRES bit 2006 de an' dartfakensten ziteert Artikel in den Beriek vun de Hoochenergiephysik. De CKM-Matrix (af un to ok blots nah Kobayashi un Masukawa nömmt), de in dat Standardmodell vun de Deelkenphysik de Mischung vun Massen-Eegentostännen un Eegentostännen vun de swaak Wesselwirken beschrifft, wee dat Ergevnis vun disse Arbeit 1973. Se hett dree Quarkgeneratschonen vörutseggt un harr de CP-Verletzung as Konsequenz, de somit in dat Standardmodell inordnet wurrn kunn. 1995 wurr dat sösste Quark vun den CDF vun dat Fermilab opdeckt un 2001 hemm dat KEK un SLAC de CP-Verletzung bi den Zerfall vun B-Mesonen mit den Experimenten Belle (KEKB) un BaBar (PEP-II) bestätigt.

Masukawa is mit Akiko Masukawa verheiraadt un hett twee Söhns.

Utteknungen

• 1985 Sakurai-Pries
• 2001 wurr he to'n Bunka Kōrōsha, to en Person mit besünner kulturell Verdeensten nömmt
• 2007 European Physical Society High Energy and Particle Physics Prize.
• 2008 Nobelpries för Physik gemeensam mit Makoto Kobayashi un Yōichirō Nambu.

Weblenken

Toshihide Masukawa. Mehr Biller, Videos oder Audiodateien to’t Thema gifft dat bi Wikimedia Commons.

• Makoto Kobayashi und Toshihide Maskawa: CP Violation in the Renormalizable Theory of Weak Interaction. In: Progress of Theoretical Physics. Band 49, 1973, S. 652–657.
• Maskawa up de Sieden vun den Nobelpries (engelsch)