Aña lus
| Describi pa URL | https://www.spektrum.de/lexikon/physik/lichtjahr/9014  |
|---|---|
| Kantidat físiko | length |
Aña lus ta un unidat di largura pa distansianan astronómiko den astronomia i kosmologia. Un aña lus ta e distansia ku lus ta biaha den vaküm den un periodo di un aña segun e kalènder Juliano. Un aña lus pues no ta un unidat di tempu, manera e nòmber ta indiká.
Pa ta presis, un aña lus ta wòrdu definí komo e distansia ku un foton lo biaha den espasio liber, infinitamente leu for di kualke vèlt di gravedat i vèlt magnétiko den un aña Juliano (365,25 dia kual kada dia ta 86.400 sekònde). Komo ku e velosidat di lus den vaküm ta pa definishon eksaktamente igual na 299.792.458 meter pa sekònde, un aña di lus ta eksaktamente igual na 9.460.730.472.580.800 meter,[1] pues rondoná na 9461 bion meter. Un aña lus ta igual na 63,241 unidat astronómiko (UA).
Unidatnan relashoná ku aña lus ta e ora lus, minüt lus i sekònde lus, e distansia ku lus ta biaha den vaküm den un ora, un minüt i un sekònde, respektivamente. Un minüt lus ta igual na 17.987.547.480 meter, òf aproksimadamente 18 bion meter, òf 18 mion kilometer. Un sekònde lus ta pa definishon 299.792.458 meter.
Algun echo
[editá | editá fuente]- E distansia entre Tera i Luna ta mas o ménos 1,3 sekònde lus.
- E distansia for di Solo pa tera ta 8,3 minüt lus.
- E diameter di e orbita di e planeta mas leu, Neptuno, ta mas o ménos 8 ora lus.
- E strea mas serka di Solo, Proxima Centauri, ta 4,22 aña lus leu.
- E sentro di nos galaksia, e Kaminda di Lechi, ta mas o ménos 28.000 aña lus leu. E diameter di Kaminda di Lechi ta aproksimadamente 100.000 aña lus.
- E otro galaksia grandi mas serka, e Galaksia Andromeda (M31), ta mas o ménos 2,54 mion aña lus leu.
- Un aña lus ta aproksimadamente 236 mion buèlta rònt di Tera (na e ekwator).
Referensia
|