Йенс Кристиан Скоу
| Йенс Кристиан Скоу | |
|---|---|
| Jens Christian Skou | |
 90-рочный Йенс Кристиан Скоу в лаборатории | |
| Познатый як | объявитель Na+-K+ пумпы |
| Горожанство | Королівство Данія |
| Уроджѣня | октобра 8., 1918 Лемвик, Дания |
| Упокоеня | мая 28., 2018 (99 р.) Оргус, Дания |
| Похованя | Risskov Kirkegård 190198166 |
| Научна робота | |
| Сферы наук | биохемия, физиология |
| Alma mater | Копенгагенска универзита |
| Узнаня | |
| Одзнакы | |
| Нобелова награда з хемии, 1997 | |
| Йенс Кристиан Скоу на Викискладѣ VIAF:91749242; GND:1123882509; LCCN:n80033312;
| |
Йенс Кристиан Скоу, *8. октобер 1918, Лемвик, Дания — †28. май 2018, Оргус, Дания — данскый дохтор и биохемик, лавреат Нобеловой награды з хемии (1997) за объявлѣня ензима натрий-калийова аденозинтрифосфатаза.[1][2]
Штудии и карьера
[едітовати | едітовати жрідло]Скоу родив ся в Лемвику, Дания в богатой фамилии торговця з деревом и угльом. Выштудовав сѣмрочный курс медицины на Копенгагенской универзитѣ (1944) и одбыв стажованя в клиницѣ в Йеррингу. Достав роботу хирурга в Ортопедичном шпиталю в Оргусу, а од року 1947 тыж научну выглядовательску роботу в Инштитутѣ Физиологии на Универзитѣ Оргус.
В року 1954 зыскав докторскый ступень Medicinae Doctor на Копенгагенской универзитѣ.
В року 1997 Скоу достав Нобелову награду з хемии за объявлѣня Na+-K+-АТФ-азы.
Од року 1988 быв на пензии, але дале занимав ся науков, свою послѣдну роботу опубликовав в року 2015.[1]
Объявлѣня Na+-K+ пумпы
[едітовати | едітовати жрідло]Предметом его штудий и темов докторской дисертации быв механизм дѣи анестетикох. Скоу выходив з роботы Алана Ходжкина и Ричарда Кейнса, котры найшли, же нерв ся взбуджуе звышѣньом концентрации йонох натрия в нервовой бунцѣ, невронѣ. Кедь стимулация нерва перестане, концентрация натрия верне ся ку нормѣ переносом натрия вон з бункы през мембрану. Скоу предположив, же дѣя анестетика звязана з его проникнѣньом до липидной верствы бунковой мембраны и закрытьом натрийовых каналох, же канал е бѣлковинна молекула и его блокованя в невронах веде ку тому, же нервны бункы не будуть годны ся взбуджовати, што дасть ефект анестезии. Пумпованя йонох натрия против концентрачного градиента потребуе енергию, а тоту застачуе енергетична молекула АТФ (аденозинтрифосфат).[2]
Скоу выокремив ензим АТФ-азу, котрый одповѣдать за транспорт йонох. Проникнувши до мембраны бункы тот ензим, активованый вонкашным калийом и внуторным натрийом, зачинать пумповати натрий вон, а калий довдну неврона, так подтримуючи высоку концентрацию калия во внутри бункы, спераючу взбуджѣня нерва. Объявлѣня Скоу вело ку найджѣню далшых йоновых пумп, включаючи тоту, што контролуе стягнѣня мускул.[2]
Одказы
[едітовати | едітовати жрідло]- Nobelpristager, læge og fysiolog Jens Christian Skou er død 99 år дан.
- Jens C. Skou, Danish biophysicist. //Encyclopaedia Britannica англ.