Enbrion

L' enbrion (del grego: έμβρυον) el ze el primo stàdio del desviłupo de un organismo eucariote diplòide. La definision de enbrion ła vària dipendindo dei organismi considerai, isteso apartegnenti solché a du regni dei viventi: animałi e piante.

Enbrion umano de sìncue stimane
Enbrion uman de nove stimane
Feto uman de dieze stimane. Abortio terapeutegamente
Diagrama de un enbrion de gałina inte el so nono dì, drento del resipiente orgànego conosesto cofà ovo o vovo.
Enbrion de fuzàzen Euonymus europaeus (in zało).

Definision

In bòtanega

I enbrioni de organismi vezetałi i ze racuante prime struture za contegneste inte l'interior de ła samesa. Le piantine enbrionałi łe prezenta tesuti precursori de łe vàrie parte de ła pianta adulta e uno o pì cotiłedoni. Co che ła piantina enbrionałe ła scumìsia a nutrirse dal teren e a crésar, el fenòmano el taca ciamarse zermenasion.

In zoołozia

Inte i animałi el tèrmano enbrion el połe ver signifegai lejermente difarenti, referii al desviłupo de l'organismo, dipendindo dei vari grupi tasonòmeghi. In tèrmani zenerałi par tuti i eumetazoi se parla de enbrion par tuti i stadi inisiałi de ła divizion del zigote, zeneralmente confinà drento de un ovo o in struture a sto cuà similàbiłi. L'enbrion dei mamìfari placentai el ze defìnio cofà cuel'organismo che el se desviłupa partindo col nome de zigote, par dopo devegner e mantegner el nome enbrion finmente che no el ga finio el desviłupo dei òrgani. Da chel momento el vegnarà ciamà feto.

Enbrion uman

Inte i èsari umani ła paroła enbrion ła vien doparada dopo de un determenà nùmaro de divizion sełułari seventemente da ła divizion del zigote, finmente a ła formasion del boton enbrionałe inte l'interior de ła blastocisti, o sia ła defarensiasion morfòlozega che ła permete de destìnguar l'enbrion da ła placenta. Na convension in dòparo ła ze anca cueła là de definire cofà enbrion, l'organismo dopo de ła formasion de l'inpianto inte ła mucoza uterina, avegnimento che inte ła dona ła ze parte de ła gravidansa dopo de ła fecondasion-concepimento. Le prime faze de desviłupo de l'organismo uman (zigote, mòruła, blàstuła, gàstruła) o solché racuante de ste cuà a volte łe ze includeste inte ła definision, altre volte no. Na volta formà el zigote, gavindo un zenoma conpleto, el scumìsia ver caraterìsteghe de l'organismo uman. Partindo da ła nona stimana de concesion, el tacarà ciamarse feto^[1]^[2]^[3] finmente al parto^[4].

Bibliografia

Gilbert, S.F., Biologia dello sviluppo, Zanichelli, Bologna, 2005, ISBN 978-88-08-07275-7

Notasion

↑ The developing human: clinically oriented embryology, ISBN 9780323611541.
↑ Neuroscience, ISBN 9781605357416.
↑ Embriología médica, in Wolters Kluwer, D. L. 2019, ISBN 978-84-17602-11-6, OCLC 1109841103. entrada il 3 de mayo de 2020.
↑ Ciclo del embrión. Medlineplus.

Altri projeti

Wikimedia Commons el detien imàjini o altri file so Enbrion
Scholia el detien schemi gràfeghi so Enbrion

Linganbi foresti

embrioneTreccani.it – Enciclopedie on line, Istituto de ła Ençiclopedia Italiana.
(EN) embryo / embryo (altra versione)Ençiclopedia Britannica, Encyclopædia Britannica, Inc.

[1] The developing human: clinically oriented embryology, ISBN 9780323611541.

[2] Neuroscience, ISBN 9781605357416.

[3] Embriología médica, in Wolters Kluwer, D. L. 2019, ISBN 978-84-17602-11-6, OCLC 1109841103. entrada il 3 de mayo de 2020.

[4] Ciclo del embrión. Medlineplus.

[1]

[2]

[3]

[4]