拉比 (猶太教)

拉比（希伯來文：רַבִּי‎；英文：Rabbi），或者譯做辣比，係猶太教既一個特別階層。「拉比」呢個字源於希伯來文既 Rav（亦都寫成 Rab），原本既意思係「偉大既人」、「高超既人」、「老師」。佢哋係有學問既學者，受過正規既猶太教神職人員訓練，既有學識，又能言善辯，熟識《塔納赫》、《塔木德》等既猶太教經典。佢哋係精神領袖、智者，亦都係宗教老師，喺猶太經學院嗰度傳授猶太教既教義，負責主持猶太教既宗教儀式、執行教規同律法，同埋指導信徒。

沿革

公元前既拉比

耶穌時代既「拉比」係古老猶太教既「拉比」，當時做「拉比」既條件比較鬆散，通常係指啲講解摩西五經既老師或者智者。幾乎當時任何人，只要熟讀呢啲經典，就可以做「拉比」，開班授徒。喺聖經《約翰福音》嗰度，施洗約翰既門徒叫約翰做「拉比」，耶穌既門徒亦叫耶穌做「拉比」。

公元後既拉比

現代既「拉比」同耶穌時代既「拉比」有一定既差異。現代人所講既「拉比」係指公元二世紀開始既猶太教「拉比」，佢哋係一群受過完整猶太文化訓練，熟識猶太律法經文，俾猶太教團體正式承認既專業學者。佢哋經常喺猶太會堂講解舊約聖經，同埋猶太傳統文化禮儀，佢哋既身份有啲似基督教既牧師同埋天主教既神父。美國既猶太教會喺1972年任命咗第一位女性「拉比」，依家美國已經有幾百個女性「拉比」，包括華裔美國人。