Thomas Cook

dr Thomas Cook

Dr Thomas Cook (* 22. Novämber 1808 z Melbourne, Derbyshire, Ängland; † 18. Juli 1892 z Leicester) isch en änglische Prieschter und e bedüütende Pionier vom Reisevercheer gsi.

s Lääbe

Dr Thomas Cook isch as Soon vom John un dr Elizabeth Cook uf d Wält cho. Won er drüü gsi isch, isch em dr Vatter gstorben un d Muetter het grad wider ghürootet. Mit zääni het er müesse d Schuel uufgää und go schaffe, er isch Schryner woorde. 1828 het er as Wanderprediger vo de Baptischten und Aktivischt gäge dr Alkoholkonsum aagfange. Anne 1833 het er d Marianne Mason ghürootet

Mit meh weder füüfhundert Lüüt vo dr Abstinänzbewegig het er am 5. Juli 1841 d Fahrt vo Leicester uf Loughborough organisiert. Me lueget hüt die Reis als die erschti i dr Gschicht vom Masseturismuss aa.

1845 isch dr Cook mit grosse Reisegruppe uf Liverpool, 1846 uf Schottland und 1851 uf London und anne 1855 s erschte Mol vo Ängland mit dr Bahn und em Schiff uf Paris. Do drby het er für d Reisegescht au s Übernachte und s Ässe i dr französische Hauptstadt organisiert, und das bedüütet, ass es die erschti Pauschalreis gsi isch.

Anne 1863 het dr Cook e Reis id Schwiiz plaanet, er het ere «First Conducted Tour of Switzerland» gseit. Do drmit het s grosse Zytalter vo den änglische Reise i d Alpen und vo de Hotäll i dr Schwiiz agfange. Am Afang isch das rächt kompliziert gsi, dr Cook het mit Ysebahne, Tampfschiff, Poschtgutsche, Treeger und Muultier müesse schaffe. D Fahrt vo anne 1863 isch mit acht Gescht, nach dr Faart dur Frankrych, vo Gämf uf Chamonix und vo döört überen is Wallis uf Leukerbad ggangen un denn über t Gemmi is Bärner Oberland und i dr Zäntralschwiiz uf d Rigi. D Jemima Morrell het vo dere Reis es Tagebuech gschribe, wo ghulfe het, d Reis id Schwiiz bi den Ängländer (wo se sech hän chöne läischte) populäär z mache.

1866 isch dr Cook uf Amerika. Syni erschti ganz wyti Pauschalreis mit Lüüt vo Ängland und Amerika het dr Thomas Cook anne 1869 uf Ägipte gmacht. 1782 isch er mit ere Gruppe uf e langi Wältreis.

Scho anne 1845 het dr Cook es Reisebüro gründet, wo sit 1879 syn Soon John Mason Cook wyter gfüert het. Mit däm syne Söön isch d Firma Thomas Cook and Son afangs zwänzigschts Joorhundert dr wältwyt füerend Abüüter vo Pauschalreise woorde. 1928 isch si a d Gselschaft Compagnie Internationale des Wagons-Lits et des Grands Express Européens verchauft worde, spöter het si dr British Railways ghört und sit 2001 isch es d Thomas Cook Group gsi.

Dr Thomas Cook würd sich im Grab umdräje, wenn er ghörti, ass die Gselschaft am 23. Septämber 2019 mit alne Gschäft het müessen uufhöre und dass do drby meh weder e halbi Milioon Turischte irgendwo uf dr Wält sind blibe hocke.

Literatur

• Jörn W. Mundt: Thomas Cook. Pionier des Tourismus, UVK, Konstanz 2014, ISBN 978-3-86764-496-9

Weblink

 Commons: Thomas Cook – Sammlig vo Multimediadateie