မဉ်ႏရက်ခမ်းသားမꩻ

"မဉ်ႏရက်ခမ်းသားမꩻ ခမ်းသားအီႏရက်ချာကရိုꩻနဝ်ꩻ" ၂၀၁၅-လွိုက်ရွေꩻပွယ်ꩻ ကထွိုင်ႏထွူလွဉ်နုဲင်းယိုခါ မန်းခမ်းထီ အခေႏအနေႏနဝ်ꩻ မန်းခမ်းကို ခမ်းသားသီး ကမောင်ꩻကော့ꩻဒါႏအတွိုင်ꩻ တွိုႏလွေꩻအီ အခေႏနေႏအဝ်ႏဒျာႏလဲ့။ အာႏဏာႏဗွေႏသီး ကထွာလွဉ်လꩻ အွဉ်ငါသားနဝ်ꩻ ခမ်းသားကျွိုက် ခမ်းသားလွိုက်တွော့ꩻ တမွေးတဝ်းသွူ၊ ခမ်းသားသီး ကျွိုက်တမုဲင်ꩻလွိုက်တမုဲင်ꩻနဝ်ꩻ ထွိုင်ႏမာꩻသွူ လွိုက်ခေးပွယ်ꩻမꩻ လꩻအဖြေႏသွူ။ အာႏဏာႏဗွေႏစနစ်ယို ခမ်းသားကျွိုက်တကျွိုက်တဝ်း နုဲင်းယိုခါ ခမ်းသားသီးသꩻဆန္ဒကို အမဲဉ်အုံအဝ်ႏလဲဉ်းသွူ ခမ်းထီစနစ်နုဲင်းမုဲင်ꩻကိုနဝ်ꩻ ၂၀၁၅-လွိုက်ရွေꩻပွယ်ꩻထွိုင်ႏလဲဉ်း ခမ်းသားသီးသꩻဆန္ဒအဖြေႏယို အာႏဏာႏဗွေႏအွဉ်ငါသားသီးတဲ့နဝ်ꩻ၊ ဒီမိုကရေစီ အွဉ်ငါသားသီးတဲ့နဝ်ꩻ အဝ်ႏထီႏလဲဉ်းဒျာႏဝင်ꩻသွူ။ မန်းခမ်းတခမ်းလုမ်း ခေးခင်ႏလမ်းအဒဝ်ႏဒဝ်ႏကို လꩻအာႏဏာႏ ကြံ့ခိုင်ရေးပါတီတွမ်ႏ ဒီမိုကရေသီ ရုဲင်ꩻတသွိုးရေꩻ အဲန်အယ်ဒီပါတီ နီဗာႏယို နွို့ခေးနဝ်ꩻ ထွာခင်ႏလမ်းအအာသွတ်ꩻသွူ၊ ဝွေꩻသီးပါတီနီဗာႏ နွို့ခေးခင်ႏလမ်းအာနုဲင်းနုဲင်းဝင်ꩻလဲ့ အောင်ဆန်းစုကြည် ကအွဉ်ငါဒါႏ အဲန်အယ်ဒီပါတီနဝ်ꩻ နွောင်ꩻလွေꩻခင်ႏလမ်းအအာသွတ်ꩻနဝ်ꩻသွူ၊ မဉ်ႏထွားယင်း တွမ်ႏ ၂၀၀၈-ခမ်းထီထွို့ꩻဗူႏပုံႏ အခေႏခံႏဥပဒေႏအလꩻ အဲန်အယ်ဒီပါတီယို နွောင်ꩻလွိုက်ရွေꩻပွယ်ꩻမဲ ခင်ႏလမ်းအာတဲင် အွဉ်ငါထွို့ꩻဗူႏနွောင်ꩻ အစိုႏရစွိုꩻနဝ်ꩻသွူ။ နုဲင်းယိုခါ ကြံ့ခိုင်ရေးပါတီနဝ်ꩻ နွောင်ꩻဆေ့ꩻလွဉ်ꩻငါႏထာꩻတဲင် ကြံ့ခိုင်ရေးကလꩻအနွောင်ꩻ အမတ်ဖုံႏတွမ်ႏ လွတ်တောႏကိုကအဝ်ႏထွူဒါႏ စဲ့ꩻအဝ်ႏယို ပေါင်ꩻခြွဉ်းခန်းစွဉ်ႏဝင်ꩻလဲ့ ဝွေꩻသီးနဝ်ꩻ အွဉ်ငါထွို့ꩻဗူႏအစိုႏရစွိုꩻ တလꩻနွောင်ꩻတဝ်းဒွုန်းသွူ။ နဝ်ꩻမꩻ ကထွာဒါႏ ခမ်းရင်ꩻသားသီး လိုꩻမျိုꩻပါတီမုဲင်ꩻတရိုꩻတဝ်း၊ ပအိုႏပါတီတဲ့ပါပါ ကထူႏခါꩻဒါႏတွမ်ႏ ကြံ့ခိုင်ရေးပါတီ မဟာမိတ်ဖုံႏနဝ်ꩻ နုဲင်ႏငံႏရေꩻအပြောင်ꩻအလုဲင်ႏကိုယို အီႏခုမ်မာꩻလွေꩻသွုပ်နုဲင်းမုဲင်ꩻဟောင်း။ နုဲင်းယိုခါ ပအိုႏနဲင်ႏငံႏရေꩻနဝ်ꩻ အဝ်ႏလွေꩻမꩻ တဖူꩻခမုဲင်ꩻလီးဟောင်း၊ ထူႏခါꩻ ကြံ့ခိုင်ရေးမဟာမိတ် ပေါင်ꩻတွမ်ႏကြံ့ခိုင်ရေးပါတီလဲ့ နုဲင်းယိုခါ ကြံ့ခိုင်ရေးပါတီ သမ်းတနွောင်ꩻတဝ်း၊ ထွို့ꩻဗူႏအစိုႏရ တလꩻတဝ်းဒွုမ်တဲင် ပအိုႏနဲင်ႏငံႏရေꩻတဖူꩻအလီးလင် အိႏချꩻနုဲင်းမုဲင်ꩻဟောင်း၊ အီႏပြောင်ꩻလုဲင်ႏလွဉ်ꩻ ဒီမိုကရေသီ မဟာမိတ်ပါတီသီးနုဲင်းမုဲင်ꩻဟောင်း။ ခါးလား ၂၀၁၀-မာꩻငါ နေင်ႏနဝ်ꩻ ကအိုပ်ချုပ်တဲ့ အိုပ်ချွုတ်လွဉ်လဲဉ်း၊ ထွိုင်ႏတွိုႏ ၂၀၁၀-လွိုက်ရွေꩻပွယ်ꩻမာꩻလွဉ်ယို ငတ်ꩻနေင်ႏကို ကအွဉ်ငါအိုပ်ချွုတ်မာꩻလွဉ်ဖေႏ ခမ်းသားမွိုးဖါ ကမာꩻဖေႏလဲဉ်းခမ်းကို လွိုင်ႏကွုန်ꩻရေꩻနဝ်ꩻ ကွပ်တမုဲင်ꩻမွော့ ခမ်းသားတထောက်ခံႏတဝ်း။ မဉ်ႏထွားယင်း နုဲင်းဖြဝ်ꩻအခဝ်နဝ်ကိုယိုနဝ်ꩻလဲ့ အဲန်အယ်ဒီ ကနွောင်ꩻခင်ႏလမ်းနဝ်ꩻ ကဲဉ်းအာအာ၊ ကြံ့ခိုင်ရေးပါတီကနွောင်ꩻနဝ်ꩻ ဟမ်းဆေ့ꩻဆေ့ꩻနဝ်ꩻသွူ၊ ပအိုႏလိုꩻမျိုꩻ ကအုံအဝ်ႏသော့ꩻအာဒါႏ ပအိုႏဒေႏသ ဝေင်ꩻနယ်ႏပေါင်ꩻ(၁၀)လွိုကိုယို ကြံ့ခိုင်ရေးပါတီနွောင်ꩻသော့ꩻဆေ့ꩻနဝ်ꩻ တဆန်ꩻတဝ်း၊ ထွာသွူပအိုႏလိုꩻမျိုꩻခြာ ပအိုႏခမ်းသားအာအရပ်ယို ပအိုႏပါတီနွောင်ꩻသော့ꩻဆေ့ꩻနဝ်ꩻ ဟမ်းဆန်ꩻဟောင်းကရိုꩻနဝ်ꩻ။ ပအိုႏပါတီနီဗာႏလွုမ်းယို ထွားပအိုႏအမျိုꩻသာꩻရေꩻတွော့ꩻ မꩻပအိုႏနဲင်ႏငံႏရေꩻ မဉ်ႏမွေးနဝ်ꩻ ပအိုႏနမ်းခြောင်ꩻနွို့သော့ꩻအာ လွတ်တောႏကိုအရေꩻ လိုꩻအဖြာꩻမုဲင်ꩻ၊ ပါတီအစွိုꩻမုဲင်ꩻ မဲဉ်ထင်ႏထင်ႏ အဝ်ႏလိုႏစွဲးပင်ႏ စွဲးကမ်းဒျာႏဝင်ꩻသွူ။ တွိုႏယိုနဝ်ꩻ လယ်ႏဒေါ့ꩻလယ်ႏဟော်ꩻချာဒျာႏ လိုꩻမျိုꩻချင်ꩻပါတီ "သော့ꩻမွုန်းပါတီယိုမဲး၊ သော့ꩻသွော့ပါတီနဝ်ꩻမဲး"ငမ်းချာဒျာႏ လိုꩻမျိုꩻချင်ꩻနမ်းခြောင်ꩻဖုံႏ၊ ပါတီဖုံႏ နွို့သော့ꩻငါလွတ်တောႏကိုနဝ်ꩻသွူ၊ မဉ်ႏထွားယင်း တွမ်ႏလွိုက်ရွေꩻပွယ်ꩻဥပဒေႏလဲ့ ဒေါ့ꩻတဖျပါတီယိုမိဉ်ꩻ၊ ထွဉ်ႏသော့ꩻပါတီနဝ်ꩻမဲး နုဲင်းနဝ်ꩻနဝ်ꩻ တကင်ꩻတဝ်း တွမ်ႏဥပဒေႏတဲင် ထွာဒျာႏနဲင်ႏငံႏရေꩻသား ထာꩻင ထာꩻတယွို့ခရာႏသွူ။ ထွိုင်ႏနွို့ခေးသွူ လွိုက်ရွေꩻပွယ်ꩻလဲ့ ပအိုႏလိုꩻမျိုꩻ ကအဝ်ႏဝေင်ꩻနယ်ႏပေါင်ꩻကအာနဝ်ꩻ တစွိုꩻချင်ႏအနေႏ တနွို့ခေးနွောင်ꩻလို့တဝ်းတဲ့ ဖန်းဝင်ꩻပဉ်ခဝ် နွို့ခေးတဲ့တရိုꩻတဝ်း၊ ခေတ်ယိုနဝ်ꩻ အာႏဏာႏယို အဝ်ႏတနတ်ပြောင်ꩻငွါ တမွေးတဝ်းဒွုမ်သွူ။ အာႏဏာႏနဝ်ꩻ အဝ်ႏဒျာႏခမ်းသားစူကိုတဲင် ပါတီတစွိုꩻတဗာႏ ဖေႏကလꩻစွူစွူ အာႏဏာႏတွော့ꩻ မဉ်ႏလောက်ꩻထူးနေးဗာႏ ခမ်းသားအာႏဏာႏ၊ မဉ်ႏလောက်ꩻနေးဗာႏ ပါတီလောင်ႏလင်၊ မဉ်ႏတခွန်ꩻနေးဗာႏမဲးနဝ်ꩻ ခမ်းသားဆန္ဒဒင်ႏ အစိုႏရတမွေးတဝ်းသွူႏ အဝ်ႏလိုႏယူႏနဝ်ꩻ ခမ်းသားတထောက်ခံႏတဝ်းယို ကွပ်ပွိုးထမုဲင်ꩻ၊ ကွပ်အိုပ်ချွုတ်ခမ်းညမ်းတွော့ꩻနဲ့၊ ကွပ်အံႏနွောင်ꩻရိမ်ထူႏအာငါႏတွော့ꩻနဲ့၊ ကွပ်တမုဲင်ꩻ ခမ်းသားကျွိုက်တဝ်း လွိုက်တဝ်း၊ ပအိုႏပါတီမဲတနွောင်ꩻတဝ်းဒါႏဖုံႏယို ပအိုႏခမ်းသား အပဲစ်တမွေးတဝ်းနဝ်ꩻတဲ့ သေႏချာႏဒျာႏသွူ။