Ѓорѓи Крстевски (сликар)

За други значења видете на појаснителната страница за Ѓорѓи Крстевски

Ѓорѓи Крстевски (Битола, 1923 - Скопје, 1985) — македонски сликар, припадник на првата повоена генерација македонски уметници, кој со своето творештво оставил значаен белег во современото сликарство.

Животопис

Крстевски е роден во Битола и до 1941 година учел во Средната трговска гимназија, а во 1951 година во Скопје го завршил Средното уметничко училиште. Во Загреб дипломирал на Академијата за ликовни уметности кај професорот Жељко Хегедушиќ, а во истиот град завршил и курс за конзервација на икони при Заводот за конзервација, а соработувал и со мајсторската работилница за витраж и мозаик на професорот Плевнер. Во неговата творечка биографија се забележани 17 самостојни изложби реализирани во дел од градовите на поранешната СФРЈ, како и податоците дека работел во Музејот на Град Скопје, краток период бил и слободен уметник, а се пензионирал како професор по ликовно образование во Средното сообраќајно училиште „Боро Петрушевски“ во Скопје. Негова специјалност била ѕидното сликарство, мозаикот, реставрацијата на иконите, но работел и со многу други техники. Тој го фрескоживописал наосот (бродот) на црквата „Св. Ѓорѓи“ од Охрид. Работел во масло, графика и е внесен во енциклопедија како единствен мајстор кој се занимава со интарзија. Во почетокот Крстевски создавал реалистички насликани платна, еволуирајќи прво во графиката кон пастилизирана форма, обработувајќи разновидни теми - пејзажи, староградска архитектура, фигуративни моменти. Катастрофалниот скопски земјотрес долго време бил негова преокупација и низ тие дела може да се воочи неговата врска со својот народ и минатото на својата земја.

Надворешни врски

• Графики што ја формирале современата ликовна сцена