ലോറൻസ് പുളിയനത്ത്

ഇംഗ്ലീഷ് വിലാസം

https://ml.wikipedia.org/wiki/Lawrence_Puliyanath

മോൺ. ലോറൻസ് പുളിയനത്ത്
മോൺ. ലോറൻസ് പുളിയനത്ത്
ജനനം	1898, ഓഗസ്റ്റ് 8 എറണാകുളം ജില്ല, കേരളം, ഇന്ത്യ
മരണം	1961, ഫെബ്രുവരി 20 എറണാകുളം
വണങ്ങുന്നത്	ലത്തീൻ കത്തോലിക്കാ സഭ

ലത്തീൻ കത്തോലിക്കാ സഭയിലെ ദൈവദാസനായി പ്രഖ്യാപിക്കപ്പെട്ട ഒരു വൈദികനാണ് മോൺ. ലോറൻസ് പുളിയനത്ത്. 2011 ഫെബ്രുവരി 04-നാണ് ഇദ്ദേഹത്തെ ദൈവദാസനായി പ്രഖ്യാപിച്ചത്. ജീവിച്ചിരുന്നപ്പോൾ തന്നെ വിശ്വാസികൾ ഇദ്ദേഹത്തിന് വിശുദ്ധനെന്ന പരിവേഷം നൽകിയിരുന്നു. കൊച്ചി രൂപതയിലെ ആദ്യ ദൈവദാസനാണ് മോൺ. പുളിയനത്ത്.

ജീവിതരേഖ

കൊച്ചി മുണ്ടംവേലി പുളിയനത്ത് പേതൃ-മറിയം ദമ്പതികളുടെ മകനായി 1898 - ഓഗസ്റ്റ് 8-ന് ജനിച്ചു. ഈ ദമ്പതികളുടെ ഏഴു മക്കളിൽ ആറാമനായാണ് ജനനം. മുണ്ടംവേലി സ്കൂൾ, മധുര സെന്റ്. ജോസഫ് സ്കൂൾ എന്നിവിടങ്ങളിൽ പ്രാഥമിക വിദ്യാഭ്യാസം പൂർത്തിയാക്കി. തുടർന്ന് 1917-ൽ ആലപ്പുഴയിലെ സേക്രഡ്‌ഹാർട്ട് സെമിനാരിയിൽ വൈദികപഠനത്തിനായി ചേർന്ന് പഠനം പൂർത്തിയാക്കി. പിന്നീട് കാൻഡി സെമിനാരിയിൽ നിന്നും ഫിലോസഫിയിൽ ഡോക്ട്രേറ്റ് നേടുകയും അവിടെ നിന്നു തന്നെ 1926-ൽ വൈദികനായി അഭിഷിക്തനാകുകയും ചെയ്തു.

വൈദികനായി അഭിഷിക്തനായ ശേഷം മോൺ. ലോറൻസ് തിസീസ് സമർപ്പിക്കുവാനായി റോമിലേക്ക് പോകുകയും തിരിച്ചെത്തിയ ശേഷം 1927 മേയ് 1-ന് സ്വന്തം ഇടവകയായ മുണ്ടംവേലി ദേവാലയത്തിൽ പ്രഥമദിവ്യബലി അർപ്പിക്കുകയും ചെയ്തു. തുടർന്ന് അദ്ദേഹം ഇടക്കൊച്ചി പള്ളിയിൽ സഹവികാരിയായി സ്ഥാനമേൽക്കുകയും ചെയ്തു. 1929 - ൽ ഈ പള്ളിയിൽ തന്നെ വികാരിയായി നിയമിതനായി. 31-ആം വയസ്സിലാണ് അദ്ദേഹം ഈ സ്ഥാനം ഏറ്റെടുത്തത്. തുടർന്നുള്ള 32 വർഷക്കാലത്തോളം ഇടക്കൊച്ചിയുടെ എല്ലാ പ്രവർത്തനങ്ങളിലുമുള്ള ഒരു ഭാഗമായിരുന്നു മോൺ. കാനോൻ നിയമങ്ങളിൽ അസാമാന്യ അറിവുണ്ടായിരുന്ന ലോറൻസിനെയാണ് സഭാമേലധ്യക്ഷന്മാർ സംശയനിവർത്തിക്കായി സമീപിച്ചിരുന്നത്.

കൊച്ചി രൂപത സ്ഥാപിതമായ 454 - ആം വാർഷികദിനത്തിലാണ് ലോറൻസ് പുളിയനത്തെ ദൈവദാസനായി പ്രഖ്യാപിച്ചത്. ഈ രൂപതയുടെ പ്രഥമ ദേശീയമെത്രാനായി നിശ്ചയിച്ചത് ഇദ്ദേഹത്തെയാണ്. എന്നാൽ അദ്ദേഹം ആ സ്ഥാനം നിരസിക്കുകയാണുണ്ടായത്. 1961 ഫെബ്രുവരി 20 - ന് മോൺ. ലോറൻസ് പുളിയനത്ത് അന്തരിച്ചു. ഇടക്കൊച്ചിയിലെ സെന്റ്. ലോറൻസ് പള്ളി സെമിത്തേരിയിലാണ് പുളിയനത്തിനെ സംസ്കരിച്ചിരിക്കുന്നത്.

ദൈവദാസപ്രഖ്യാപനം

എറണാകുളം ജില്ലയിലെ ഇടക്കൊച്ചി സെന്റ്. ലോറൻസ് പള്ളിയിൽ 2011 ഫെബ്രുവരി 04 ന് വൈകിട്ട് 3.30 നാണ് ദൈവദാസപ്രഖ്യാപനം നടത്തിയത്. മോൺ. ലോറൻസ് പുളിയനത്തെ അൾത്താരവണക്കത്തിനായി സഭ അനുവാദം നൽകുന്നതിന്റെ പ്രഥമചടങ്ങാണ് ഈ ദൈവദാസപ്രഖ്യാപനം. പ്രഖ്യാപനച്ചടങ്ങിനിടയിലെ ദിവ്യബലി അർപ്പണം നടത്തിയത് വരാപ്പുഴ അതിരൂപതയുടെ ആർച്ച് ബിഷപ്പ് ഡോ: ഫ്രാൻസീസ് കല്ലറയ്ക്കലാണ്. കൊച്ചി രൂപതാ മെത്രാൻ ഡോ: ജോസഫ് കരിയിൽ, കോട്ടപ്പുറം രൂപതയുടെ നിയുക്ത മെത്രാൻ ഡോ: ജോസഫ് കാരിക്കശ്ശേരി എന്നീ ബിഷപ്പുമാർ ഈ ചടങ്ങിലെ സഹകാർമ്മികരായിരുന്നു. ദിവ്യബലി അർപ്പണത്തിനു ശേഷം ദൈവദാസൻ മോൺ. ലോറൻസ് പുളിയനത്തിന്റെ ജീവചരിത്രത്തിന്റെ ഡി.വി.ഡി. ബിഷപ്പ് ഡോ: ഫ്രാൻസീസ് കല്ലറയ്ക്കൽ പ്രകാശനം ചെയ്തു.