Ronald Erwin McNair
Ronald Erwin „Ron“ McNair (* 21. Oktober 1950 in Lake City, South Carolina, USA; † 28. Januar 1986 bi Cape Canaveral, Florida) weer en US-amerikaansch Astronaut, de bi de Challenger-Katastrooph to Dood keem.
Leven
[ännern | Bornkood ännern]Bit 1967 hett McNair de Carver High School in sien Gebortsoort besöcht, bevör he ünnerstütt dör en Stipendium en Physikstudium an de North Carolina Agricultural and Technical State University upnehm, dat he in 1971 mit en Bachelor un en magna-cum-laude-Lob afsluuten dee. He gung dornah an dat bekannte Massachusetts Institute of Technology (MIT), wo he an sien Dokterarbeit schreev, de he in Physik 1976 afsluuten kunn.
Nah den Afsluss an dat MIT wurr he as Physiker an den Hughes Research Laboratories in Malibu, Kalifornien anstellt.
1978 wurr McNair för dat Ruumfohrtprogramm vun de NASA utwählt un is in' Februar 1984 mit de Challenger-Mission [[STS 41-B) ünner dat Kommando vun Vance DeVoe Brand as Missionsspezialist eerstmals in't All flagen. Pilot bi disse Mission weer Robert Lee Gibson un de beid anner Missionsspezialisten Bruce McCandless un Robert Lee Stewart. Hööchtpunkt bi disse Mission weer de eerste free Butenbordinsatz dör McCandless un Stewart.
McNair wurr denn utwählt för de Mission STS 51-L mit dat Space Shuttle Challenger , de an‘ 28. Januar 1986 um 11:38 Ühr Oortstiet vun dat Kennedy Space Center in Florida afhaben is. De anner Crew-Liddmaaten weern Kommandant Dick Scobee, Pilot Michael John Smith, Missionsspezialisten Judith Arlene Resnik, Ellison Shoji Onizuka un de Bruuklastspezialisten Gregory Bruce Jarvis un Sharon Christa McAuliffe. Dör en Leck in den Drievstofftank is de Challenger aber nah 73 Sekunn explodeert un all söben Besattensliddmaaten keemen to Dood.
Wiels sien letzt Floog sull dat en Weltpremiere geven:
1986 wurr de franzöösch Musiker Jean Michel Jarre vun den US-Bundsstaat Texas un de amerikaansch Ruumfohrtbehörde NASA to en Konzert nah Houston inlaaden. Anlaat weer dat 150-johrige Jubiläum vun Texas un dat 25-johrige Jubiläum vun de NASA. Eegen för dit Konzert nehm Jarre dat Album Rendez-vous up. De Astronaut Bruce McCandless broch Jarre up de Idee een vun de Stücke vun Ron McNair bi de Challenger Mission STS-51-L mit dat Saxophon inspeelen to laaten. McNair weer en begeistert Saxophonist un dat weer plaant, dat he en vun hüm mitschreeven Stück in't All spelen sull. Dat sull dat eerste in' Weltruum upnommen Musikstück ween. Dat dorbi dreiht Video sull wiels dat Konzert up en groot Video-Wand inspeelt wurrn. Nah den Dood vun Ron McNair wull Jarre dat Konzert eenig aftoseggen, wurr aber vun McCandless un anner Astronauten vun dat Gegendeel övertüügt. Rendez-vous Houston – A City In Concert funn statt un wurr vun Jarre den storven Astronauten vun de Challenger widmet. Jarre hett McNair den Titel Last Rendez Vous / Dernier Rendez Vous "Ron's Piece" up sien Album Rendez-Vous, dat 1986 rutgeven wurr, widmet.
Nah sien Dood wurrn en Maandkrater un de Asteroid (3354) McNair nah hüm nömmt. De Bundsbehörde för Billen hett en Förderprogramm för lernbehinnert Schöler nah hüm nömmt. Dat gifft en Ronald McNair Mathe- un Wetenschaps-Zentrum an de Francis Marion University in Florence, South Carolina, de Dr. Ronald E. McNair Academic High School in Jersey City un en Grundschool in St. Louis, de nah hüm nömmt wurr. In Brooklyn, New York, NY gifft dat en Gedenkstäe för Ronald McNair. In dat Davis Planetarium in de Binnenstadt vun Jackson, Mississippi wurr dat Ronald E. McNair Space Theater hüm to Ehren nömmt.
McNair wurr vun Joe Morton in den kontrovers diskuteerten TV-Film Challenger speelt, de gegen den Willen vun de Angehörigen vun de Opfer bi disse Katastrooph produzeert wurr.
Weblenken
[ännern | Bornkood ännern]
- spacefacts.de: Körtbiografie