Ursula von der Leyen

Ursula von der Leyen (2019)

Ursula Gertrud von der Leyen, b. Albrecht (* 8. Oktober 1958 in Ixelles/Elsene, Region Brüssel-Hööftstadt, Belgien), is en düütsche Politikersche vun de CDU. Se hett an’n 17. Dezember 2013 as eerste Fro dat Regeer in’t Bundsministerium för’t Verdeffenderen övernahmen.

Familie

Ursula von der Leyen is de Dochter vun den vörmoligen Ministerpräsidenten vun Neddersassen, Ernst Albrecht, un den siene Fro Heide Adele. Ursula von der Leyen hett fiev Bröer, dormank de Präsident vun den Medienkonzern Modern Times Group, Hans-Holger Albrecht.

Vun 1986 af an is se verheiraat mit den Medizin-Perfesser un Unnernehmer Heiko von der Leyen. De beiden hefft seven Kinner. De Familie leevt vun 2007 af an in Borgdörp bi Hannober up dat Wesewark vun ehrn olen Vadder, de an Demenz lieden dee. Dor hett se mithulpen, em to plegen.

Utbildung un Beroop

Na dat Abitur hett Ursula von der Leyen vun 1977 bit 1980 Volksweertschopslehr an de Universitäten Chöttingen un Mönster studeert. Denn hett se dat Studium afbraken. 1978 besöch se de London School of Economics and Political Science (LSE). Achternah studeer se Medizin an de Medizinsche Hoochschool Hannober (MHH). Dor hett se 1987 dat Staatsexamen maakt un ehre Approbatschoon as Dokter kregen. Dornah hett se as Assistenzdoktersch an de Froenklinik vun de MHH arbeit’. Hier hett se 1991 ok promoveert to’n Dr. med. mit de Arbeit „C-reaktives Protein als diagnostischer Parameter zur Erfassung eines Amnioninfektionssyndroms bei vorzeitigem Blasensprung und therapeutischem Entspannungsbad in der Geburtsvorbereitung“. Nadem ehr drüdd Kind up’e Welt kamen is, hett se sik den Afsluss vun ehre Utbildung to’n Facharzt begeven. Vun 1992 bit 1996 hett se mit ehre Familie in de USA leevt. As de Familie wedder torüch in Düütschland weer, is se vun 1996 bit 2002 togange ween as wetenschopplich Mitarbeitersche bi Friedrich-Wilhelm Schwartz an de Afdeelung för Epidemiologie, Sozialmedizin un Gesundheitssystemforschung an de Medizinsche Hoochschool Hannober. 2001 hett se sik dor den akadeemschen Grad vun en Master of Public Health (MPH) hoolt.

Wie dat in de Politik mit Ursula von der Leyen lopen is

Ursula von der Leyen (Oktober 2006)

Ursula von der Leyen is vun 1990 af an Liddmaat vun de CDU. Vun 1996 bit 1997 hett se in den CDU-Fachutschuss för Sozialpolitik vun dat Land Neddersassen seten. Achternah weer se ok bi den Arbeitskreis för Dokters vun de CDU-Neddersassen mit bi. Vun 2001 bit 2004 höör se to den Raat vun de Stadt Sehnde to un is hier ok Vörsittersche vun de CDU-Fraktschoon ween. Bito hett se ok in de Regionsversammlung vun de Region Hannober seten. Dor weer se Vörsittersch vun den Utschuus Gesundheit un Krankenhüser.

An’n 4. März 2003 hett se ehren Posten as Ministersche för Sozialsaken, Froenslüde, Familie un Gesundheit in de neddersassische Regeerung unner Ministerpräsident Christian Wulff antreden. In ehre Amtstied hett se dat Blinnengeld afschafft, ofschoonst de Sozialverbänne dor duchtig gegenan gahn sünd. Vun 2003 bit 2005 hett se in den Landdag vun Neddersassen seten. Bi den CDU-Bundsparteidag in Düsseldörp in’n Dezember 2004 is se in’n eersten Wahlgang in dat Präsidium vun de CDU wählt wurrn. Vördem harr sik jedereen wunnert, datt Herman-Josef Arentz dat nich schafft harr. Vun Februar 2005 af an is se Vörsittersch ween vun de CDU-Kommischoon „Öllern, Kind, Beroop“. An’n 17. August 2005 is se vun Angela Merkel in dat CDU/CSU- Kompetenzteam för de Bundsdagswahl 2005 beropen wurrn. Se weer dor för de Feller Familie un Gesundheit tostännig. An’n 22. November 2005 is Ursula von der Leyen unner Eed nahmen wurrn as Bundsministersche för Familie, Senioren, Froenslüde un Jugend in de Bundsregeerung unner Kanzlersch Merkel (Kabinett Merkel I).

Bi de Bundsdagswahl 2009 is von der Leyen over de List vun dat Land Neddersassen in den Düütschen Bundsdag wählt wurrn. Achternah is se an’n 28. Oktober 2009 in dat Kabinett Merkel II, wedder as Familienministersche, unner Eed nahmen wurrn. Bi de Afspraken un de ganze Snackeree over de tokümstige Koalitschoon harr dat eerst heten, von der Leyen scholl wiss Gesundheitsministersche weern. Up düt Feld harr se ok för de Unionsparteien verhannelt. Up düssen Posten is denn avers de FDP-Mann Philipp Rösler kamen, ok ut Neddersassen. Nadem Franz Josef Jung as Bundsminister för Arbeit un Sozialsaken Bott geven harr, hett von der Leyen an’n 30. November 2009 den sien Amt övernahmen. Nadem Bundspräsident Horst Köhler an’n 31. Mai 2010 sien Amt hensmeten harr, tell von der Leyen to de Lüde, över de as mögliche Nafolgers in’t Präsidentenamt snackt wurrn is. Man amenne is dor nix vun wurrn. Na de Bundsdagswahl 2013 is se an’n 17. Dezember Bundsministersche för’t Verdeffenderen in’t Kabinett Merkel III worrn.

Warke

• Ursula von der Leyen: C-reaktives Protein als diagnostischer Parameter zur Erfassung eines Amnioninfektionssyndroms bei vorzeitigem Blasensprung und therapeutischem Entspannungsbad in der Geburtsvorbereitung, Med. Hoochschool Hannober 1990
• Ursula von der Leyen, Maria von Welser: Wir müssen unser Land für die Frauen verändern. C. Bertelsmann, München März 2007, ISBN 978-3-570-00959-8
• Ursula von der Leyen, Liz Mohn: Familie gewinnt. Bertelsmann-Stiftung, April 2007, ISBN 978-3-89204-927-2

Belege

Familienministers vun de Bundsrepubliek Düütschland

Franz-Josef Wuermeling | Bruno Heck | Aenne Brauksiepe | Käte Strobel | Katharina Focke | Antje Huber | Anke Fuchs | Heiner Geißler | Rita Süssmuth | Ursula Lehr | Hannelore Rönsch | Angela Merkel | Claudia Nolte | Christine Bergmann | Renate Schmidt | Ursula von der Leyen | Kristina Schröder | Manuela Schwesig | Katarina Barley | Franziska Giffey

 

Arbeitsministers vun de Bundsrepubliek Düütschland

Anton Storch | Theodor Blank | Hans Katzer | Walter Arendt | Herbert Ehrenberg | Heinz Westphal | Norbert Blüm | Walter Riester | Wolfgang Clement | Franz Müntefering | Olaf Scholz | Franz Josef Jung | Ursula von der Leyen | Andrea Nahles | Katarina Barley | Hubertus Heil