Hadia Tajik

Hadia Tajik er fødd i Bjørheimsbygd i Strand og tok 2004 ein bachelorgrad i journalistikk ved Høgskulen i Stavanger (no Universitetet i Stavanger). I 2005 tok ho mastergrad i menneskerettar ved Kingston University i England. Tajik er òg utdanna jurist med ein mastergrad i rettsvitskap ved Universitetet i Oslo frå 2012.

I åra 2001–2006 arbeidde Tajik som journalist og skribent i mellom anna Aftenposten, VG og Dagbladet, og i seinare år skreiv ho jamleg kommentarar og bokmeldingar for Morgenbladet, Ny Tid og Stavanger Aftenblad.

Hadia Tajik starta sitt politiske arbeid som leiar av Strand AUF frå 1999 til 2002 og som politisk nestleiar i AUF i Rogaland frå 2001 til 2003. Frå 2008 var ho medlem av sentralstyret i AUF.

I 2006 vart ho politisk rådgjevar i Arbeids- og inkluderingsdepartementet, og i 2008 hadde ho eit vikariat som rådgjevar på Statsministerens kontor. Ein kort periode arbeidde ho også i Justisdepartementet før ho i 2009 var attende som politisk rådgjevar i Arbeids- og inkluderingsdepartementet.

I perioden 2009-2017 var Tajik vald til stortingsrepresentant frå Oslo. Frå 2017 var ho stortingsrepresentant frå Rogaland. Ho sa frå seg attval frå Rogaland foran stortingsvalet 2025 og forsøkte i staden å bli innvald frå Oslo. Nominasjonskomiteen i Oslo Arbeidarparti foreslo henne på sikker andreplass på lista, men ho tapte kampvoteringa på nominasjonsmøtet for Kamzy Gunaratnam.

Under regjeringa Stoltenberg II var Tajik kulturminister i perioden 2012 til 2013, då regjeringa gjekk av.

I perioden 2013–2017 var Hadia Tajik leiar for justiskomitéen på Stortinget. Ho vart òg nestleiar i Arbeidarpartiet i 2015. Ved stortingsvalet 2017 vart Tajik vald inn til si tredje periode som stortingsrepresentant og vart nestleiar i arbeids- og sosialkomiteen. I perioden 2019–2021 var ho første nestleiar i finanskomiteen på Stortinget. Ho var også parlamentarisk nestleiar i Arbeiderpartiet 2017–2021.

Ved stortingsvalet 2021 vart ho vald inn til si fjerde periode på Stortinget, og gjekk samstundes inn som arbeids- og inkluderingsminister i regjeringa Støre. Men ho måtte trekkje seg i mars 2022 etter avsløringar om uklåre leigekontraktar for å skaffe seg pendlarbolig i si tid som politisk rådgjevar. Ho trakk seg og som nestleiar i partiet. Frå 2023 til 2025 var ho nestleiar i Justiskomiteen.

Mellom 2007 og 2009 var ho medlem av Språkrådets fagråd for samfunn og høgare utdanning.

Frå 2025 er Hadia Tajik tilknytta advokatfirmaet Haavind.

I 2001 redigerte Tajik antologien Svart på hvitt. I boka samla ho tekstar skrivne av ulike minoritetsungdomar om identitet, rasisme og diskriminering. Tajik har sjølv foreldre som innvandra frå Pakistan kring 1980, og då Tajik blei statsråd i 2012 var ho den første norske statsråden med bakgrunn frå islam. I perioden 2009–2013 var ho òg den einaste faste representanten på Stortinget med familiebakgrunn frå eit ikkje-vestleg land.

I 2020 gav ho ut boka Frihet – en politisk og personlig historie, og i 2023 kom boka Drømmer for min datter.

• Arbeidarpartiet
• Stortinget
• Stortingsrepresentantane 2021–2025
• Arbeids- og sosialdepartementet

• Stortinget: Hadia Tajik
• Tiden Norsk Forlag: Hadia Tajik