Storia del Ghana

El teritorio che ancò ciamemo Ghana el ga na storia longa, ma no sempre se pol distinguar realtà da mito. No ghe xe documenti serti prima de l’arivo de i eoropei, e se ga da fidarse solo de la tradision orale. Inoltre, no se ga da sbaiarse co el Regno del Ghana, che el se catava pi a nord, inte la rejon a caval tra Mauritania e Mali. El regno pi importante che el ga interesà el Ghana de ancò el xe sta quelo de i ashanti.

I ashanti

I ashanti i xe el grupo etnico numericamente pi importante del Ghana. En inte el pasà i xera na naxion militare ben organisà. I ashanti i xe rivà inte la rejon che i ocupa ancò in tel 1200 d.C. sirca. Questo el xe el tempo co tanti popoli de l’Africa Ocidentale i ga imigrà a sud, forse a causa de guere in tel nord. I ashanti e altri grupi de la fameja akan i se sa stabilio su le coline del Ghana sentrale e i ga formà vari regni. Le miniere de oro le ga parmeso lo svilupo de la trata comerciale co i regni del Ghana e del Mali. Verso el 1600, el re del clan Oyoko el ga scominsià a unificar i vari regni inte una confederasion. I re locali i mantegnea el so poter, ma l’union de i vari clan la ghe dava forsa par metarse in oposision al regno Denkyira che gavea controlà la rejon fin alora. Verso el 1670, el re Osei Tutu el xe stà bon de atacar el regno Denkyira e sotometerlo. El mito del sentarin de oro el xe de sto tempo. Durante na riunion e cai ashanti, el prete Okomfo Anokye el ga domandà on segno dal cielo. On sentarin de oro el xe vegnù zo e el se sa posà su i genosi del re Osei Tutu. Okomfo Anokye el ga subito caio che quelo el xera on segno de benedision par l’union de i ashanti e par el novo cao Osei Tutu. El novo regno el gavea la so cavedal a Kumasi.

Eoropei

I portoghexi i xe stà i primi eoropei a visitar la rejon entel 1470. En tel 1482 i portoghexi i ga costruio el famoxo castel de Elmina par farghene on marcà stàbiłe so la costa. Olandexi, inglexi, svedexi e todeschi i ga seguio l’esempio de i portoghexi e i ga costruio fortini o altre struture longo la costa. I inglexi i ga seguio na politega de protesion de i regni locali. I ashanti i ga provà a oporse co na serie de guere contro le etnie de la costa. En tel 1821, i inglexi i ga asentrà el control de i vilagi mercantili ne le mane del governo de Londra. I ga anca firmà de i tratati co le etnie de la costa e meso le baxi de la nova colonia de la Costa de l’Oro, come la rejon la xera ciamada. Dopo varie guere contro i ashanti (1826-1902) I inglexi i xe riusidi a verghe el sopravento. En tel 1922, la Lega de le Naxioni la ga dato el Togo todesco a i inglexi par aministrarlo. En tel 1957 le Naxioni Unie la ga deciso che la colonia del Togo la fuse tacà a quela del la Costa de l’Oro. Kwame Mkrumah, fondator del Partio de la Convension del Popolo, el ga domandà l’indipendensa in tel 1954 e in tel 1956. El Ghana el xe rivà a l’indipendensa el 6 marso 1957. I quatro teritori de Costa de l’Oro, Ashanti, Protetorato del Setentrione e el Togo Britanico i vegnea unii in tel novo paexe del Ghana.

Novo ordinamento

Nkrumah el xe stà eleto Primo Ministro del Ghana, ma el so oprato el xe stà critica da varie forse politeghe. Nkrumah el ga fato pasar la lege Prevension Detentiva (1958) che el ghe permetea de metar in prison i opositori sensa proceso. En tel 1960, el ga volù cambiar l’ordinamento faxendo del Ghana na republica. En tel 1963 el Ghana el xe stà tra i promotori de l’Organizasion de l’Unità Africana. Ent el 1964, dopo on rferendum popolare, el paexe el xe diventà ono Stato monopartìtego e Nkrumah eleto presidente a vita. El 24 febraro 1966. i militari i ga fato on colpo de Stato co Nkrumah el xera a l’estero. I leader militari i ga tegnù el governo fin al 1969. A le elesion popolari del otobre 1969, el Partio del Progreso de Kofi Busia el ga vinto la majoria de i segi e el ga formà el governo. Busia el xera el Primo Ministro. El governo de Busia nol xe stà bon de controlare la perdita de valore de l’economia e, el 13 gianaro 1972, i militari i ga fato n’altro colpo de Stato. El colonel Ignatius Kutu Acheampong el ga formà el Consilio Naxionale de Redension. Acheampomg el xe stà meso da parte in tel 1978 parchè el no xe stà bon de riformar el governo. El general Frederick William Kwasi Akuffo el ga tolto el so posto. Akuffo el ga scominsià subito a pianificar el ritorno al governo sivile ma la crisi sempre pi grave e la corusion le ga spinto on grupo de zoini soldà a far n’altro colpo de Stato el 4 giunio 1979. El cao el xera Jerry John Rawlings.

L’era de Rawlings

Rawlings el ga fato aprovar la costitusion, preparà le elesion parlamentari e presidensiali e restituio a i sivili el poter el 24 setembre 1979. El novo presidente, Hilla Limann, el xera ono de i seguaci de Nkrumah. El novo governo el ga rispetà i diriti umani e laorà par metar in pràtega la nova costittusion. Parò nol xe stà bon de jutare l’economia e la distansa tra richi e poareti la xe diventà sempre pi granda. El 31 dicembre 1981, Rawlings el ga fato n’altro colpo de Stato. Rawlings el ga costituio el Consilio Provisorio de Difesa Naxionale che volea combatar la corusion e l’evasion fiscale. I citadini i podea participar a comitati locali che prendea decision sul teritorio. A la fin del 1982, Rawlings el ga scominsià el programa de desentralizasion politega. Rejoni, distreti e comunità locali le ga ricevù poteri pi forti lasando al governo el compito de coordinar el movimento politego e de interesarse de la politega estera e de l’economia generale. En tel 1984, la Comision Naxionale de la Democrasia la ga studià el modo de rendar pi democràtego el proceso decisionale. Co le elesion politighe e aministrative del 1994 (novembre e dicembre) se marca el ritorno a la democrasia. Rawlings el xe stà eleto presidente in tel 1996.

Cambio de guardia

En tel 2000, le elesion prsidenziali le ga meso John Agyekum Kufuor del Novo Partio Patriotico sul segio presidenziale. Kofuor el ga mantegnù le promese eletorali de rispetar i diriti umani. Kufuor el ga laorà sora-de-tuto par ridur el debito publico e quelo esterno. El Ghana el xe ono de i paexi col pi alto debito foresto, ma anca ono d ei paexi pi richi, co grandi potensialità econòmeghe e vaste risorse naturali. Kufuor el xe stà rieleto in tel 2004.

Portałi