Kubink

Kubink
Кубинка

Lidnanznam	Flag
Valdkund	Venäma
Eläjiden lugu (2024)	23,472 ristitud
Pind	12 km²
Telefonkod	+7−49 869-x-xx-xx
Avtokod	50, 90, 150, 190, 750
Aigvö	UTC+3 (MSK+0)

Kubink (ven.: Ку́бинка) om Venäman lidn da raudtesol'm Moskvan agjan päivlaskmas. Mülüb Odincovon lidnümbrikho (edel vn 2019 vilukud — rajonha), sen koumanz' lidn eläjiden lugun mödhe nelläspäi.

Istorii

Eländpunkt mainitase ezmäižen kerdan vl 1571 kuti anttud Ivan Kubenskii-ruhtinasele Počinki-žilo. Nimitaškanzihe Kubenskoje-žiloks vl 1584 valdoičijan kanzannimen mödhe. Luzikoiden i nübliden valand oliba eläjiden käzimahtoiden keskes 18. voz'sadan lopus. Vl 1870 Kubink-raudtestancii radaškanzi kahtes kilometras žilospäi. Žilo raudtestancijanno i vanh žilo ühtištuihe aigan mändes, žilon nimituz jäi raudtestancijan mödhe. Lidnanvuitte žilo sai lidnan statusad vl 2004.

Kubink šingotase avia- i raudtetransportan edheotandoil, velosipediden tegimel («Velomotors»-kompanii, vspäi 2003), kolbasan edheotandal i mebel'fabrikal. «Patriot»-puišt (54 km²) om sätud päivnouzmha lidnaspäi, järed Sündun Raštvoiden pühäpert' (Venäman armijan päjumalanpert') om saudud sen territorijal vll 2018−2020.

Geografijan andmused

Lidn sijadase lidnümbrikon suvipäivlaskmas, korktal sijal, 200 m ü.m.t. keskmäižel korktusel. Setun'-jogi (ven.: Се́тунь 23 km pitte, Moskvan üläjoksmusen oiged ližajogi) om lidnan pohjoižröunaks. Trasn-jogi (ven.: Трасна 12 km pitte, Naran hura ližajogi) om lidnan suviröunaks. Om saudud uitoid jogil. Naran uitod (läz 20 km² pindal) zavodišoiš vides kilometras suvipäivlaskmha lidnaspäi.

Matkad Moskvhasai (Moskvan rengazavtotehesai) om 50 km päivnouzmha, Uden Moskvan röunhasai om kümne kilometrad suvipäivnouzmha, lidnümbrikon Odincovo-keskushesai om 40 km päivnouzmha. Toižed lähembaižed lidnad (orhal) oma Zvenigorod 20 km pohjoižhe-pohjoižpäivnouzmha, Golicino i Krasnoznamensk 20 km päivnouzmha, Naro-Fominsk 22 km suvhe.

«Vaugedvenäma»-avtote (M1-trass) mäneb lidnan pohjoižen i suvižen paloiden keskes. Možaiskan mante (A100-trass) läbitab lidnan pohjoižpalad. Kubink-1-raudtestancii radab lidnan pohjoižes «Moskv (Vaugedvenäman päraudtestancii) — Smolensk»-keskustal vspäi 1870. Kubink-2-raudtestancii om olmas Moskvan agjan rengazraudtel vspäi 1943, sijadase kahtes kilometras pohjoižhe-pohjoižpäivnouzmha lidnaspäi. Erine kümnekilometrine raudtesarak ühtenzoitab lidnan keskuzpalad «Patriot»-puištonke.

Tobmuz

Kubinkan lidnankund oli vhesai 2019. Sen pind oli 242,26 km², mülüti nell' pen't žilod i 19 küläd Kubinkan ližaks, ühthine ristitišt oli 23 497 eläjad vl 2018. Nügüd'aigan Kubinkan territorialižen ohjanduzkundan pind om 225,2 nellikkilometrad.

Eläjad

Vl 1970 žilon ristitišt oli 7 295 eläjad, vl 1989 — 8 019 eläjad. Vn 2010 Venäman rahvahanlugemižen mödhe lidnan eläjiden lugu oli 22 964 ristutud, rajonan (nüg. lidnümbrik) kuz' procentad, vn 2021 — 23 146 ristitud. Kaikiš suremb lidnan ristitišt oli enamba 26 tuhad eläjid vll 2002−2009 (26 300 rist. vll 2005, 2007−2008).

Rahvahad (2010): venälaižed — 90,0 %, ukrainalaižed — 5,9 %, vaugedvenälaižed — 1,4 %, toižed rahvahad — 2,7 %.

Ortodoksižen hristanuskondan nell' pühäpertid oma kaičenus i saudud lidnas: kaks' jumalanpertid i kaks' časounäd.

Lapsiden opendusen aluzkundad oma seičeme päivkodid (nomer 7, 17, 42, 50, 56, 73, 74), kaks' keskškolad (nomer 1 i 2), kul'turan da sädamižen keskuz, čomamahtoiden škol, fizkul'turiž-sportivine keskuz. Professionaližen opendusen aluzkundad ratas lähembaižiš lidnoiš.

Galerei

• 
  Kubink-il'mbaz (2010)
• 
  Mikoi-arhangelan jumalanpert' (1803−1817), vn 2012 nägu
• 
  Sirtud Kubinkha «Messerschmitt»-tegim reparacijan mödhe vl 2017
• 
  Kubink-1-päraudtestancii vl 2009
• 
  Kubink-2-raudtestancijan sauvuz vl 2013

Irdkosketused

• Lidnümbrikon tobmuden aluzkundoiden oficialine sait (odin.ru). (ven.)
• «Patriot»-puišton sait (parkpatriot.ru). (ven.)