Ensignbus
Ensignbus係英國雅息士郡Purfleet一間公司。佢專做二手巴士買賣、開篷觀光巴士業務，並喺雅息士郡經營幾條巴士線，有時亦會派巴士去做鐵路替代服務。另外佢亦有一個巴士博物館，主要收藏前倫敦巴士。
史
[編輯]Ensignbus喺1972年成立，初時主要接第啲公司嘅巴士服務合約。1979年，倫敦運輸局開始提早淘汰旗下嘅丹拿/利蘭Fleetline，喺往後幾年Ensignbus自己一間公司接咗其中近2000架，自此開始佢嘅二手巴士買賣業務。大部分經過檢查同埋所需嘅改裝之後就賣出去畀其他巴士公司，有啲更運咗出口。
1980年代，Ensignbus開始喺倫敦經營開篷巴士業務，後來Ensignbus收購London Pride Sightseeing並將佢發大嚟做。經過激烈競爭，去到1998年Ensignbus賣London Pride Sightseeing嗰時，喺倫敦經營開篷觀光巴士業務嘅差唔多只淨番London Pride Sightseeing同埋大巴士公司。
同樣喺1980年代，Ensignbus開始經營倫敦嘅合約巴士線，1990年Ensignbus將倫敦合約巴士業務賣畀香港嘅北海集團並改叫Ensign Citybus（後來改叫首都城巴，Capital Citybus。後來賣畀第一集團成為First Capital，再同First CentreWest整合成First London）。1998年開始，Ensignbus再次經營倫敦合約巴士線，但Ensignbus喺1999年將佢賣咗畀Town and Country Buses。
1998年，Ensignbus設立新牌子City Sightseeing，喺世界多個地方開展開篷觀光巴士業務。呢啲業務之中，有啲係Ensignbus自己擁有，有啲係由第啲公司買個經營權嚟做。喺City Sightseeing業務擴充期間，Ensignbus喺2000年買返London Pride Sightseeing，2001年London Pride Sightseeing同Arriva旗下嘅The Original London Sightseeing Tour（The Original Tour）合併。2002年，Ensignbus收購City Sightseeing嘅競爭對手Guide Friday。2011年初，Ensignbus將City Sightseeing賣畀西班牙City Sightseeing Worldwide SL，但就留番City Sightseeing喺澳洲悉尼、意大利同埋美國華盛頓特區嘅業務。
2004年開始，Ensignbus喺雅息士郡開辦巴士線，往後再接多幾條巴士線，業務一路做到而家。
2023年，第一集團收購Ensignbus，而旗下嘅古典巴士就繼續由創立Ensignbus嘅Newman家族持有[1]。
參考
[編輯]- ↑ "FirstGroup agrees to purchase Ensignbus business". routeone. 8 February 2023. 喺8 February 2023搵到.
