Вячаслаў Уладзіміравіч Адамчык

Вячаслаў Уладзіміравіч Адамчык
Асабістыя звесткі
Дата нараджэння	1 лістапада 1933(1933-11-01)
Месца нараджэння	Варакомшчына, Навагрудскі павет, Навагрудскае ваяводства, Польская Рэспубліка
Дата смерці	5 жніўня 2001(2001-08-05) (67 гадоў)
Месца смерці	Мінск, Беларусь
Пахаванне	Кальварыйскія могілкі
Грамадзянства	Польская Рэспубліка  СССР  Беларусь
Дзеці	Адам Глобус і Міраслаў Шайбак
Альма-матар	аддзяленне журналістыкі філалагічнага факультэта БДУ (1957) Вышэйшыя літаратурныя курсы пры Саюзе пісьменнікаў СССР[d]
Месца працы	Знамя юности Голас Радзімы Беларусь Полымя Нёман Маладосць Беларусьфільм Мастацкая літаратура Бярозка
Прафесійная дзейнасць
Род дзейнасці	драматург, пісьменнік, перакладчык, журналіст, сцэнарыст, паэт
Мова твораў	беларуская
Грамадская дзейнасць
Член у	Саюз пісьменнікаў СССР Саюз беларускіх пісьменнікаў
Прэміі	Літаратурная прэмія імя Івана Мележа (1980) Дзяржаўная прэмія БССР імя Якуба Коласа (1988)
Узнагароды

Вячасла́ў Уладзі́міравіч Ада́мчык (нар. 1 лістапада 1933, в. Варакомшчына, Навагрудскі павет, Навагрудскае ваяводства, Польшча, цяпер Дзятлаўскі раён — 5 жніўня 2001, Мінск) — беларускі празаік, драматург, кінасцэнарыст.

Біяграфія

Нарадзіўся ў сялянскай сям’і. Скончыў сямігодку (1949), працаваў грузчыкам на станцыі Наваельня, адначасова вучыўся ў вячэрняй школе. У 1952—1957 займаўся на аддзяленні журналістыкі філалагічнага факультэта БДУ.

Працаваў у газетах «Знамя юности» (1957—1958), «За вяртанне на Радзіму» (1958—1960), рэдактарам Дзяржаўнага выдавецтва БССР (1960—1962), рэдактарам аддзела публіцыстыкі часопіса «Полымя» (1962—1963). Скончыў Вышэйшыя літаратурныя курсы пры СП СССР у Маскве (1965). Працаваў літсупрацоўнікам часопіса «Нёман» (1965—1967), загадчыкам рэдакцыі часопіса «Полымя» (1967—1969), рэдактарам аддзела прозы, намеснікам галоўнага рэдактара часопіса «Маладосць» (1969—1977), галоўным рэдактарам сцэнарнай майстэрні пры кінастудыі «Беларусьфільм» (1977—1980), намеснікам галоўнага рэдактара выдавецтва «Мастацкая літаратура» (1980—1982). З 1982 — галоўны рэдактар часопіса «Бярозка». Прымаў удзел у рабоце XXXVIII сесіі Генеральнай асамблеі ААН (1983).

Член Саюза пісьменнікаў СССР і Беларусі з 1960 года.

Памёр 5 жніўня 2001 года ў Мінску. Пахаваны на Кальварыйскіх могілках.

Творчасць

Дэбютаваў вершамі ў 1952. Першае апавяданне апублікавана ў 1957 г. Аўтар зборнікаў прозы «Свой чалавек» (1958), «Млечны шлях» (1960), «Міг бліскавіцы» (1965), «Дзікі голуб» (1972), «Дзень ранняй восені» (1974), «Раяль з адламаным вечкам» (1990) і раманаў «Чужая бацькаўшчына» (1978, паводле рамана зняты аднайменны мастацкі фільм (1982) і пастаўлены тэлеспектакль (1983)), «Год нулявы» (1983), «І скажа той, хто народзіцца…» (1987), «Голас крыві брата твайго» (1990).

Напісаў сцэнарыі да дакументальных фільмаў «Іван Мележ» (зняты ў 1977), «Валянцін Таўлай» (зняты ў 1978), «Дзядзька Якуб» (зняты ў 1981), п’есу «Раіса Грамычына» (1989). Пераклаў кнігу балгарскіх народных казак «Незвычайны асілак» (1961), паасобныя творы М. Прышвіна, Ю. Казакова, С. Залыгіна і інш.

Прэміі і ўзнагароды

• Лаўрэат Літаратурнай прэміі імя І. Мележа (1980) за раман «Чужая бацькаўшчына»
• Дзяржаўнай прэміі БССР імя Якуба Коласа (1988) за раманы «Чужая бацькаўшчына», «Год нулявы», «І скажа той, хто народзіцца…».

Сям’я

• Міраслаў Адамчык
• Адам Глобус

Літаратура

• Адамчык Вячаслаў // Беларускія пісьменнікі (1917—1990): Даведнік / Склад. А. К. Гардзіцкі. Нав. рэд. А. Л. Верабей. — Мн.: Мастацкая літаратура, 1994. — 653 с.: іл. — 22 000 экз. — ISBN 5-340-00709-X.;
• Вячаслаў Адамчык // Беларускія пісьменнікі: Біябібліяграфічны слоўнік. У 6 т. / пад рэд. А. І. Мальдзіса. — Мн.: Беларуская Энцыклапедыя, 1992—1995.;
• Сучасная беларуская проза. Традыцыі і наватарства. Анталогія. — Мн.: Сэр-Віт, 2003.