Вінцук Склубоўскі

Вінцук Склубоўскі
Вінцук Склубоўскі
Род дзейнасці	грамадскі дзеяч, юрыст
Дата нараджэння	31 ліпеня 1911
Месца нараджэння	Малышкаўшчына, Ашмянскі павет, Віленская губерня, Расійская імперыя;
Дата смерці	2 мая 2002 (90 гадоў)
Месца смерці	Беласток, Падляскае ваяводства, Польшча;
Месца пахавання	Беласток;
Месца працы	Наша воля (1935); Польскае Радыё Беласток; Ніва;
Альма-матар	Універсітэт Стэфана Баторыя; Віленская беларуская гімназія;
Член у	Таварыства беларускай школы; Беларускае грамадска-культурнае таварыства;

Вінцук Склубоўскі (31 ліпеня 1911, в. Малышкаўшчына, Віленская губерня — 2 мая 2002, Беласток) — беларускі грамадска-культурны дзеяч, юрыст і пісьменнік.

Біяграфія

Нарадзіўся ў вёсцы Малышкаўшчына Ашмянскага павета Віленскай губерні. Бацькі — Аляксандр і Вольга Склубоўскія.

Вучыўся ў Беларускай гімназіі ў Вільні, а пазней ва Універсітэце Стэфана Баторыя ў Вільні. Там уключыўся ў левы беларускі студэнцкі рух, быў дзеячам беларускага руху Заходняй Беларусі. Быў членам Таварыства беларускай школы, часта сустракаўся з Рыгорам Шырмам, Максімам Танкам, Янкам Хворастам.

Быў галоўным рэдактарам беларускай газеты «Наша воля», першы нумар якой выйшаў 24 снежня 1935 года ў Вільні. Пакінуў выразны след у беларускім руху ў міжваеннай Польшчы. У час нямецкай акупацыі хаваўся, а пасля быў вывезены на працу ў Германію. Пасля прыходу саветаў апынуўся на захадзе Польшчы, працаваў у судзе, а ў 1957 годзе пераехаў у Беласток на працу ў Ваяводскі суд.

Уключыўся ў дзейнасць Беларускага грамадска-культурнага таварыства. Рыхтаваў радыёперадачы, якія раз на тыдзень ішлі на Польскім радыё. Пачынаючы з 1958 года штотыдзень аказваў юрыдычную дапамогу ў рэдакцыі «Нівы». Яго юрыдычныя парады друкаваліся ў «Ніве» і «Беларускіх календарах». У гэтых жа выданнях ён публікаваў гістарычныя артыкулы, звязаныя з беларускім даваенным рухам, а таксама прозу. Адначасова быў членам навуковага гуртка, які існаваў пры БГКТ.

Быў шматгадовым членам, членам прэзідыума, а ў 1966—1969 гадах старшынёй БГКТ. Узнагароджаны шматлікімі медалямі і ордэнамі, у тым ліку Афіцэрскім крыжам адраджэння Польшчы. Пахаваны на гарадскіх могілках Беластока.

Спасылкі

На Вікісховішчы пакуль няма медыяфайлаў па тэме, але Вы можаце загрузіць іх
Міхась ХМЯЛЕЎСКІ. Памёр Вінцук Склубоўскі (нявызн.)(недаступная спасылка). Тыднёвік беларусаў у Польшчы «Ніва» № 20 (2401). Архівавана з першакрыніцы 8 сакавіка 2021.
Cmentarz Miejski w Białymstoku. WINCENTY SKŁUBOWSKI (нявызн.).