ယံလꩻခန်းသွော့
"ယံလꩻခန်းသွော့ နီပအိုဝ်ႏအခွင်ꩻအရေꩻ" မြန်မာခမ်းကို ကအောဝ်ႏအုံသော့ꩻဒါႏ ခမ်းရင်ꩻသားလိုꩻမျိုꩻဖုံႏအကို နီပအိုဝ်ႏလိုꩻမျိုꩻယို ထွာဒျာႏခွိုꩻနွယ်ႏတန်၊ လိတ်လုဲင်ꩻ ယေန်ႏငဲးမုꩻ ငေါဝ်းငွါ အကွဉ်အကꩻလဲ့ အောဝ်ႏဒျာႏ၊ သမဲင်ꩻခွေါင်ခွေါင်တဉ်ႏတဉ်ႏလဲ့ အောဝ်ႏဒျာႏ လိုꩻမျိုꩻတမျိုꩻရိုꩻကီလဲ့ နီအခွင်ꩻအရေꩻနောဝ်ꩻ တဗွိုန်ပီတောဝ်းဒွိုန်း တွမ်ႏခမ်းရင်ꩻသားလိုꩻမျိုꩻလင်နောဝ်ꩻသွူ။ စွိုးခွိုꩻဂွုဏ်ႏအင်္ဂါႏ ကဗွေစွုမ်ႏငါႏ နီပအိုဝ်ႏလိုꩻမျိုꩻယို ဗွိုန်ပီဒျာႏလိုꩻမျိုꩻတန် ယံလꩻလွဉ်နုဲင်းနုဲင်း မာꩻပဲင်ႏခွင်ꩻတွမ်ႏ ကလꩻထွိုက်သင်ꩻဒါႏ အခွင်ꩻအရေꩻဖုံႏယို ဖေႏကလꩻနောဝ်ꩻ အထျꩻအောဝ်ႏဒျာႏ နီနာꩻသီးလွောင်ႏဗူႏရေꩻ သွီႏထီꩻရက်ပဲင်ꩻ။ မြန်မာခမ်းကို ခမ်းရင်ꩻသား လိုꩻမျိုꩻအောဝ်ႏ (၁၃၅)အကို နီပအိုဝ်ႏလိုꩻမျိုꩻယို အောဝ်ႏနံပါတ်စဲဉ်ႏ (၇)တဲင် လိုꩻဖြာꩻပေါင်ꩻအနေႏ တဆေ့ꩻတောဝ်း ရိုꩻဗာႏနုဲင်းနောဝ်ꩻသွူ။ ဝင်ꩻခမ်းတဲ့နုဲင်းနောဝ်ꩻ၊ နီခမ်းတဲ့နုဲင်းနောဝ်ꩻ ခမ်းရင်ꩻသားလိုꩻမျိုꩻတန် ဖေႏကလꩻဝင်ꩻအခွင်ꩻအရေꩻ နေးတွမ်ႏအနယ်ꩻပရိယာယ်ႏ၊ ဥပမာႏ- လိုꩻမုꩻရေꩻအစွိုꩻ၊ စီꩻပွာꩻရေꩻအစွိုꩻ၊ ခမ်းထီနဲင်ႏငံႏရေꩻအစွိုꩻ၊ စဲ့ꩻရေꩻအစွိုꩻ-စတဲင် ဝင်ꩻလွောင်ႏဗူႏသေꩻခါꩻ ပဉ်မျိုꩻမျိုꩻ၊ ပဉ်စားစား၊ အစွိုꩻအဗူႏအာကီစွဉ်ႏလဲ့ ဝင်ꩻရေႏမိုးချက် ပီဗွိုန်ဒျာႏဝင်ꩻ၊ တလွိုဆန်တောဝ်း ခေါင်းဆောင်တန်အွဉ်ငါ အဆက်ဆက် တဖူꩻရဲဉ်ႏတွော့ꩻ အခွင်ꩻအရေꩻ အဗွေတဗာႏ ဝင်ꩻခံႏစာꩻဗာႏ နမ်းပဲင်ႏခွင်ꩻဝင်ꩻလꩻဗာႏ၊ နောဝ်ꩻမꩻ နီနာꩻသီးအောဝ်ႏလိုႏလꩻသတိꩻ၊ ထူႏသွဉ်ခန်ꩻ၊ ထွားနုဲင်းဗာႏဝင်ꩻလိုꩻမျိုꩻတန်မꩻ နီပအိုဝ်ႏဘဝ၊ နီပအိုဝ်ႏကောဝ်ႏထွန်ႏထျꩻယို နီအီႏတွိုႏလꩻနောဝ်ꩻသွူ။ နီပအိုဝ်ႏလိုꩻမျိုꩻယိုခါ ခမ်းကောင်တယောဝ်း၊ ခမ်းဒွမ်တယောဝ်း လိုꩻသေလိုꩻဒါႏ၊ လိုꩻပညာႏသားဖုံႏ အာလွဉ်၊ ကအာလွဉ်အတွိုင်ꩻ စီꩻပွာꩻရေꩻအစွိုꩻလဲ့အောဝ်ႏ၊ လိုꩻမုꩻရေꩻအစွိုꩻဖုံႏလဲ့အောဝ်ႏ၊ စဲ့ꩻရေꩻအစွိုꩻဖုံႏလဲ့အောဝ်ႏ၊ အစွိုꩻပေါင်ꩻစွုမ်ႏ ကအောဝ်ႏခွုမ်မာꩻဒါႏ ထာꩻမာꩻဖုံႏယို ဖေႏကထွာဒျာႏ နီပအိုဝ်ႏတာႏလွဉ်းလွဉ်း၊ ဗွိုန်ပီနုဲင်းဝင်ꩻလိုꩻမျိုꩻတန် ကအွဉ်ခွုမ်မာꩻဒါႏ နီနာꩻအတွိုင်ꩻ အရေꩻတန်ငါႏနောဝ်ꩻသွူ။ လိုꩻမျိုꩻတမျိုꩻ၊ ခမ်းထီတဖြုံႏ ဖေႏကလွိုင်ႏကွိုန်ꩻထင်ႏထိုလွဉ်နောဝ်ꩻ ပညာႏရေꩻယိုထွာအထျꩻ စွိုးခွိုꩻအွဉ်ငါ ခေါင်းဆောင်တန်ဖုံႏ အောဝ်ႏထီႏထွꩻနုဲင်းနောဝ်ꩻမꩻ ယိုခါ အထူꩻဒေႏသ(၆) ပအိုဝ်ႏဟံႏနယ်ႏကို ကအောဝ်ႏဒါႏ ဒုံတွိုင်ꩻဒုံတွိုင်ꩻနောဝ်ꩻ ခေါင်းဆောင်တန်သီး ကွီဖေႏလိတ်သွဉ်ကျောင်ꩻ၊ ဗွောင်ဖေႏမဲ့နားမꩻ နီပအိုဝ်ႏဘဝ အုံအောဝ်ႏမုꩻ အဆင်ႏအရန်း ထင်ႏထိုလွဉ်ဗာႏနုဲင်းယိုနောဝ်ꩻသွူ။ မဉ်ႏရက်မွေးစွိုးခွိုꩻ၊ မဉ်ႏထီႏချာမွေး နီလိုꩻမျိုꩻအကျိုꩻတရာꩻ၊ နောဝ်ꩻသွူတကာႏတောဝ်း မဉ်ႏမဲဉ်လꩻမွေး နီပအိုဝ်ႏခမ်းထီနောဝ်ꩻ နီပိုနီလီꩻယို ဖေႏသွော့ပညာႏ၊ ဒါႏထွူပညာႏတနီꩻခါ နမ်းတာႏခွိုꩻတာႏ အောဝ်ႏလိုႏမာꩻနဲင်ႏငံႏတောႏအစိုႏရဌာႏနကိုလဲ့ အောဝ်ႏလိုႏလွေꩻတဖြာꩻစီႏလဲ့သင်၊ တစွိုꩻလွုမ်းအနေႏလဲ့သင်၊ ဖျင်လွေꩻဗာႏ နီနမ်းတွမ်ႏသꩻ ဖေႏကလꩻလွဉ် နီအခွင်ꩻအရေꩻ ကျံႏလွေꩻဗာႏ ခမ်းရင်ꩻသား လိုꩻမျိုꩻပေါင်ꩻစွုမ်ႏအခြာ၊ တွမ်ႏအနယ်ꩻပညာႏ၊ နောဝ်ꩻမꩻ လꩻနွောင်ꩻနီခမ်းထီ၊ တသွီႏချင်ႏ တယာႏချင်ႏ နီပအိုဝ်ႏအချင်ꩻချင်ꩻဒျာႏမွော့ဟွေး- ယူႏလꩻသေႏသေႏဝင်ꩻနုဲင်းနောဝ်ꩻတဲင် ယံလꩻခန်းသွော့ နီပအိုဝ်ႏအခွင်ꩻအရေꩻတွမ်ႏ နီပအိုဝ်ႏခမ်းထီနောဝ်ꩻ မဲဉ်တွိုႏမုဲင်ꩻကိုတွိုႏ၊ မဲဉ်မာꩻတမုဲင်ꩻမာꩻ ခွိုꩻရက်သꩻယို အွဉ်ႏအထျꩻ လွောင်ႏဗူႏစွီႏစူꩻ ခွုမ်မာꩻလွေꩻခန်းသွော့ဝင်ꩻအကျောင်ꩻ လောဝ်းဟွိုန်တမာဗာႏ ခမ်းသားမွိုးဖါသီး နုဲင်းယိုနောဝ်ꩻသွူ။[၁][၂]